Kryeministri Rama tha në “Opinion” se do të hedhë në gjyq ish-kryeministrin e Kosovës Ramush Haradinaj, pas një akuze të këtij të fundit, se një vlerë prej 10 miliardë eurosh do të ndahej mes kryeministrit shqiptar, presidentit të Kosovës Hashim Thaçi dhe presidentit serb Aleksandër Vuçiç.
Vetë Haradinaj ka deklaruar se “ndalova grabitjen 10 miliardë euro, që do të realizohej nëpërmjet planit të ndarjes së Kosovës! Ky ishte pikësynimi i fshehtë ekonomik, në planin e shkëmbimit të territoreve ndërmjet Kosovës dhe Serbisë.
Thaçi, Vuçiç dhe Rama ishin bashkëpunëtorë në realizimin e kësaj skeme. Por unë e ndalova këtë grabitje dhe miniera e Trepçes, sot e prej dy muajsh, i përket vetëm Kosovës”, është shprehur Haradinaj.
Kjo ka qenë deklarata me akuza për Ramën, pas të cilës kryeministri shqiptar Edi Rama ka deklaruar se tashmë do të përballet me Haradinajn në një proces gjyqësor.
Është hera e parë që një Kryeministër apo drejtues kaq i lartë i shtetit shqiptar, që të artikulojë një gjë të tillë për Kryeministër apo drejtues tjetër të lartë në Kosovë.
Por me sa duket kjo është rruga më e mirë për ti dhënë fund spekullimeve me teza nacionaliste në nevojën për konsum momental e të brendshëm politik, në dy anët e kufirit formal mes dy shteteve shqiptare në Ballkan.
