Policia e Tiranës vuri në pranga një 33-vjeçar, i cili posedonte nëj arsenal armësh në banesën e tij.
Gjatë kontrollit të kryer në banesën e Gj.M., u gjetën një pushkë sportive, 92 fishekë, një thikë, një shufër metalike, 11 ora dore dhe enë kuzhine. Këto armë ishin të padeklaruara nga 33-vjeçari.
Ai është shoqëruar në Komisariatin Nr.5 nga forcat e rendit.
Njoftimi i policisë:
Kamëz
Bashkëpunimi komunitet-polici, vë në pranga një 33-vjeçar për armëmbajtje pa leje.
Finalizohet nga Komisariati i Policisë Nr.5, operacioni policor i koduar “Titanium”.
Sekuestrohen armë zjarri, pushkë sportive, fishekë luftarakë, armë të ftohta, dhe sende të tjera të kundraligjshme.
Shërbimet e Komisariatit të Policisë Nr.5, mbi bazën e informacioneve të marra nga qytetarët, se një shtetas mbante në banesë armë zjarri e sende të tjera të kundraligjshme, kanë organizuar dhe zhvilluar operacionin policor të koduar “Titanium”, si rezultat i të cilit u bë arrestimi në flagrancë i shtetasit: Gj. M., 33 vjeç, banues në Tiranë.
Gjatë kontrollit të ushtruar në banesën e këtij shtetasi, Policia gjeti dhe sekuestroi në cilësinë e provës materiale:
- •Një armë zjarri pistoletë; një pushkë sportive; 92 fishekë luftarakë; një thikë; një shufër metalike; 11 ora dore dhe një set me enë kuzhine, të kundraligjshme.
Në përfundim të veprimeve të para hetimore u bë arrestimi në flagrancë i shtetasit Gj. M., për veprat penale “Mbajtja pa leje e armëve dhe e municionit”, “Mbajtja pa leje e armëve sportive” dhe “Mbajtja pa leje e armëve të ftohta”.
Materialet procedurale iu referuan për veprime të mëtejshme Prokurorisë së Rrethit Gjyqësor Tiranë.
