Ragip Hajdini, i njohur ndryshe me nofkën “Daja”, është një prej të akuzuarve si të implikuar në grabitjen e miliona eurove në Rinas. 50-vjeçari nga Peja, ishte i arrestuari i 6-të i akuzuar për grabitjen e milionave, i cili u vu në pranga pranë Shkëmbit të Kavajës.
Në një video të sekuestruar nga Prokuroria për Krimet e Rënda, rezulton se në momentin kur ka ndodhur grabitja, ai ka qenë në një restorant në Spitallë duke drekuar me një grup miqsh.
Gjykata ka dhënë masën e sigurisë arrest me burg për të, teksa ai u shpreh në atë kohë se nuk ka lidhje me grabitjen dhe se nuk është personi me nofkën “Daja” që kërkohet. Në dëshminë e tij ai ka kërkuar ballafaqim me Alkond Bengasin, i cili e ka përmendur si emër të përfshirë në grabitje.
Ai ka shtuar se ka lidhje me familjen Murataj dhe se ka qenë edhe në varrimin e Admir Muratajt në Tropojë.
Hajdini rezulton me precedentë të ngjashëm penalë edhe në Kosovë, aty ku ka qenë i dyshuar për grabitjen e 25 kg ar nga Dhoma e Dëshmive në Policinë e Pejës, bashkë me 5 persona të tjerë.
