Kultura e festimit të humbjes së fitore, nuk ka qenë pjesë e ADN-së kombëtare shqiptare. Ka popuj të tjerë në rajonin e Ballkanit, që e kanë patur këtë, një mënyrë të jetesës së tyre historike.
Përshembull megjithëse koalicioni Ballkanik e humbi betejën e Fushës Kosovës, më 1389 me trupat e Perandorisë Osmane, serbët e festojnë këtë si fitore. Në 28 Qershorin e 1989, në përkujtimin e 600 vjetorit të kësaj beteje, Sllobodan Millosheviç mbajti në Gazimestan në prani të rreth 2 milionë të pranishmëve, fjalimin antishqiptar që e ngjiti në krye të pushtetit në Beograd. Kjo ngjitje nëpërmjet festimit të humbjes si fitore, shënoi edhe nisjen e shkatërrimit të ish Jugosllavisë.
Çuditërisht kjo qasje, kjo kulturë po përhapet edhe tek lidershipi i opozitës sonë, të cilët qëshkurse kanë kaluar në 2013 në opozitë, po i festojnë të gjitha humbjet e tyre politike dhe elektorale si fitore. Besoj ju kujtohet sesi Lulzim Basha e shpalli fitoren në zgjedhjet e 2015, por më pas u kutpua se PD kishte humbur rreth 75% të pushtetit lokal në gjithë Shqipërinë.
Në zgjedhjet e 2017, PD e Lulzim Bashës mori rreth 240 mijë vota më pak se PD e Sali Berishës së 2013, megjithatë Lulzim Basha e festoi edhe këtë humbje si fitore. Pak më vonë u kuptua që PS kishte fituar aq mandate se e krijoi e vetme qeverinë, duke nxjerrë edhe LSI në opozitë.
Ndërsa tani, në zgjedhjet e 30 Qershorit 2019, edhe PD edhe LSI kanë shpallur fitoret e tyre të mëdha historike. Por, asnjëra dhe as tjetra siç e dimë të gjithë nuk ishin fare në garë. Por kjo nuk i pengon që të festojnë fitoren. Imagjinoni sesa do të kishin “fituar” nëse do të kishin hyrë në garë!
Opozita tha se do rrëzonte Edi Ramën dhe nuk e kanë bërë. Por megjithatë, ata paskan fituar.
Sali Berisha, Lulzim Basha, Ilir Meta dhe Monika Kryemadhi thanë gjithë këto muaj se po nuk iku Edi Rama, do shkrihet opozita. Por ai jo vetëm që nuk ka ikur por edhe fitoi zgjedhjet e sotme. Por, përsëri paska fituar opozita!
Opozita e rrugës tha se nuk do zhvilloheshin zgjedhjet më 30 Qershor, por ja që ato u zhvilluan siç tha PS dhe Edi Rama. Por çuditërisht prapë paska “fituar” opozita!
“Fitorja” e rradhës bazohet tek një shifër e pjesëmarrjes së mbi 25- 30% e votuesve të listave zyrtare të zgjedhësve, në votimet e kësaj të diele. Ose 700- 800 mijë votues, ose më shumë sesa në zgjedhjet e 2015 dhe ato të fundit të 2017. Atëherë ku është problem këtu se nuk po e kuptoj?!
Opozita jonë nga nesër në mëngjes nuk ka më asnjë kryeplak fshati, asnjë kryetar njesie administrative, asnjë këshilltar bashkiak, asnjë kryetar bashkie dhe asnjë deputet në Parlament, por ka filluar të festojë “fitoren historike”.
Në këto kushte urimi është: “Fitore” të tilla paçin gjithmonë dhe i festofshin edhe me më shumë gaz e hare sesa sonte. Sepse e nesërmja vjen shpejt dhe kur të kuptojnë se PD dhe LSI nuk kanë më asnjë përfaqësues të saj në asnjë lloj pushteti në gjithë territorin e vendit, gjithkush do kuptojë se të festuarit e fitores si humbje, është filozofia që po e çon opozitën tonë nga humbja në humbje!
