Mijëra besimtarë myslimanë, burra e gra kanë falur mëngjesin e sotëm Namazin e Bajramit të Madh në sheshin “Skënderbej”. Besimtarët të zbathur janë falur sot para Zotit në mbyllje të muajit të madhërueshëm të Ramazanit.
I gjithë sheshi Skënderbej ka qenë i mbushur plot me besimtarë, burra, gra e fëmijë. Kryetari i Komunitetit Mysliman të Shqipërisë, Bujar Spahiu, u lut që Zoti në këtë festë ta begatojë dhe ta mbushë me mirësi dhe paqe vendin tonë.
“Gjatë këtyre ditëve të mos mungojë vëmendja jonë ndaj fëmijëve, prindërve, të moshuarve, të sëmurëve dhe shtresës në nevojë. Le të heshtim në vend të fjalës së keqe, e kur të flasim, të flasim bukur”, u shpreh Spahiu.
Të rrethuar nga një atmosferë e ngrohtë besimi e vëllazërie, pjesëmarrësit e shumtë janë përshëndetur dhe kanë ndarë me njëri-tjetrin gëzimin dhe emocionet e kësaj dite të madhe paqeje, mirësie e shpërblimi.
Emri Fitër Bajram vjen nga fakti se myslimanët para ditës së Bajramit shpërndajnë lëmoshë, solidarizohen me të varfrit dhe kështu në këtë mënyrë festojnë së bashku këtë festë. Shihni momentet e kapura nga lutja e madhe nga objektivi i LSA.
