Nje dite me pare Partia Demokratike publikoi draftmarrëveshjen nëpërmjet së cilës synon që në zgjedhjeve e ardhshme të dalë me kandidatë të përbashkët me partitë aleate opozitare.
Duket se negociatat e Bashës me aleatët e tij nuk do të jenë të lehta pasi i pari që ka paralajmëruar një krisje, madje deri në ndarje me Lulzim Bashën ka qenë, Agron Duka i Partisë Agrare Ambientaliste.
Duka, i ftuar në ‘Provokacija’ me Muç Nanon, ka thënë se platforma ka nevojë për disa përmirësime, në lidhje me Kodin Zgjedhor dhe bujqësinë, ose ndryshe këto dy ‘kushte’ mund ta ndajnë PAA nga PD.
‘Na ka ardhur një platformë nga PD, ku nuk vihet prioriteti mbi bujqësinë dhe kjo do jetë një nga arsyet, ndoshta përveç asaj që ne e quajmë kryesore reforma zgjedhore e Kodi Zgjedhor, të cilat nëse nuk përmirësohen në këtë platformë bashkëpunimi edhe mund edhe të na ndajnë pavarësisht se jemi në opozitë mund të dalim të ndarë në zgjedhjet e ardhshme.
S’ka pakënaqësi. Në një platformë bashkëpunimi duhet të vihet një paragraf i theksuar për bujqësinë dhe si mund të zhvillohet bujqësia në të ardhmen.
Nëse kjo nuk bëhet njëlloj si ligji zgjedhor, atëherë ç’mund të presim.
Të paktën të na thuhet, të konsultohet me ne, dhe nëse vendosim këto pika atëherë mund të gjykojmë në marrëdhëniet tona në të ardhmen me opozitën.
PD bëhet fjala sepse ata e kanë bërë këtë lloj platforme’, ka thënë ndër të tjera Agron Duka.
Kreu i PAA ka shtuar gjithashtu se platforma do të rishikohet nga anëtarësia e partisë dhe më pas do të dilet në një konkluzion, por që nëse dy ‘kushtet’ e sipërpërmendura nuk realizohen, ata do të futen në zgjedhje pa PD.
