Akademiku Rexhep Qosja ka cmuar rolin e madh te luajtuar nga gazetari, shkrimtari dhe skenaristi i njohur, Kiço Blushi, ne jeten dhe në krijimtarinë shpirtërore shqiptare.
Ne nje mesazh pas ndarjes nga jeta te shkrimtarit, Qosja ka thënë se ai ushtroi ndikim çlirues, përparues, qytetërues dhe demokratizues.
“Me pikëllim të madh mësova lajmin për ndarjen nga jeta të shkrimtarit, skenaristit, publicistit dhe veprimtarit të shquar kulturor Kiço Blushi. Të gjithë ata që e njohën, të gjithë ata që e takuan, siç pata fatin ta njoh e ta takoj edhe unë, nuk do ta harrojnë kurrë. Me fjalën e tij gjithmonë të ndershme, gjithmonë të qartë e të vendosur, me përkushtimet e tij mendore e ndjenjore ndaj të drejtës e të vërtetës, ai ushtroi ndikim çlirues, përparues, qytetërues, demokratizues në jetën e në krijimtarinë shpirtërore shqiptare. Vepra e tij dhe emri i tij mbesin përgjithmonë në historinë e kulturës së popullit shqiptar. Familjarëve, miqve e dashamirëve të tij të shumtë u shpreh ngushëllimet e mija më të thella”, ka shkruar Qosja.
