Deputeti i PD, Enkelejd Alibeaj ka dalë në një deklaratë për mediat duke akuzuar qeverinë pas publikimit të raportit të Europol-it për drogën. Alibeaj shprehet se pa nxjerrjen para drejtësisë të Tahirit, Dakos, Sejdinit, Habilajve dhe Balilajve nuk ka hapje negociatash.
‘Europol konfirmoi se Shqipëria vijon që të mbetet burimi i kanabisit. Raporti thotë se tregu i drogës në BE është 24 mld euro se kanabisi përbën pjesën më të madhe të tregut dhe se Shqipëria është burimi kryesor. Raporti rikonfirmoi se nuk është opozita që po i nxin faqen vendit, por qeveria.
Shqipëria është burimi kryesor i drogës se ky është prioriteti i kryeministrit. Shqipëria duhet të negocionte për BE, por është burim i drogës sepse ky ishte dhe vazhdon të jetë prioritet i Ramës. Vendi u bë burim pastrimi parash, pjesën më të madhe e zotëron Rama.
Droga dhe krimi që Shqipëria eksporton në BE është arsyeja kryesore që i mohohet hapja e negociatave. BE po kërkon cdo ditë luftë kundër drogës dhe nxjerrjen para drejtësisë të të paprekshmëve. Ata po e thonë qartë që nuk hapen negociatat nëse nuk nxirren para drejtësisë Tahiri, Dako, Sejdini, Habilajt dhe Balilajt” deklaroi ai.
Europol ka publikuar dje raportin për narkotikët, për periudhën 2015-2016, gjatë të cilës ajo që vihet re është “epidemia” e drogërave sintetike, të cilat kanë hyrë në tregjet e konsumit me 620 substanca të reja. Në raport theksohet se bandat shqiptare konsiderohen si “padrone” të kanabisit.
Fjala e plotë e Alibeajt
Më 6 Dhjetor, ditën kur Edi Rama fajësoi opozitën se po i nxinte faqen vendit me akuzat për drogën, EUROPOL konfirmoi se Shqipëria vazhdon të mbetet burimi kryesor i trafikut të kanabisit në Bashkimin Europian.
EUROPOL eshte agjensia ligjzbatuese që mbështet 28 vendet anëtare të Bashkimit Europian për luftën kundër terrorizmit dhe krimit të organizuar. Raporti i tij thotë se:
1. Tregu i drogës në Bashkimin Europian është 24 miliardë euro,
2. Se kanabisi përbën pjesën më të madhe të tregut që kontrollohet nga organizitatat kriminale,
3. Se Shqipëria është burim kryesor i trafikut të kanabisit dhe
4. Dhe se pastrimi i parave nga tregtia e drogës është rritur.
Raporti i EUROPOL rikonfirmon se nuk është opozita ajo që po i nxin faqen vendit, por është qeveria e Edi Ramës që ka lejuar dhe ka përfituar nga trafiku i kanabisit drejt Europës.
Shqipëria mund dhe duhej të kishte qenë vendi kryesor mikpritës i biznesit për shkak të taksave të ulëta, lehtësive ligjore, luftës kundër korrupsionit dhe sigurise juridike! Por jo! Shqipëria është burim kryesor i drogës, sepse ky ishte dhe vazhdon të jetë prioriteti i kryeministrit!
Shqipëria mund dhe duhej të kishte qenë një nga vendet e Ballkanit jo vetëm anëtar i NATO-s, por edhe një vend që negocionte për anëtarësim në Bashkimin Europian! Por jo! Shqipëria është burim kryesor i drogës, sepse ky ishte dhe vazhdon të jetë prioriteti i kryeministrit!
Shqipëria në 4 vjet të Edi Ramës u bë burim i pastrimit të parave nga tepsia e madhe e parave të drogës, pjesën më të madhe të së cilës e zotëron Edi Rama. Dhe këto para duhen larë e pastruar për të financuar blerje të reja politikanësh e votuesish. Droga dhe krimi që Shqipëria eksporton në Bashkimin Europian janë arsyeja kryesore që Shqipërisë i mohohet prej tre vjetësh hapja e negociatave.
Vendet e Bashkimit Europian po kërkojnë përditë luftë kundër drogës dhe krimit të organizuar dhe nxerrjen para drejtësisë të të paprekshmëve. Ato po e thonë fare qartë se nuk do t’i hapin negociatat, nëse në Shqipëri nuk shkatërron organizatat kriminale të trafikut dhe nese nuk nxirren para drejtësisë politikanët që e lejuan dhe bashkëpunuan me krimin.
Rruga e Shqipërisë për në Bashkimin Europian kalon vetëm nga nxjerrja para drejtësisë e Saimir Tahirit, Vagjush Dakos, Qazim Sejdinit, Agron Xhafës, Habilajve dhe Balilajve me shokë.
