Viti i ri 2019 po futet me aromën e sherreve të vjetra politike, në Shqipëri. E kush më mirë se “i sinqerti” Tritan Shehu mund ta paralajmëronte atë që përflitej prej ditësh në koridoret e pushtetit në Tiranë! Në një postim të fundit, deputeti demokrat shkruan:
“Mos dekretimi nga Presidenti Meta i ministrave të rinj, duke filluar nga Ministri i Jashtem, do të ishte i bazuar.
Kandidaturat e reja për në Qeveri përbëjnë një “shaka” kakofonike, që nuk premton përmirësim të krizës ku është futur vendi, përkundrazi…
Emërimi kryeministror, së pari i Ministrit të Jashtëm, detyrë që lidhet me çështje të sigurisë kombëtare, integrimit, stabilitetit të Rajonit, ruajtjes së tërësisë teritoriale të kombit, marëdhenieve me NATO-n etj, përbën sëpaku aventurizëm politik i maskuar ky me një ”nacionalizëm” grotesk.
Kryeministri duhet të qartësojë veçanërisht qëllimin e atij emërimi (që po shqetëson edhe miqtë tane), origjinen e propozimit te asaj kandidature, mundesine e nje korelacioni me disa procese te rrezikeshme, etj.
E kunderta, ulja e nivelit te argumentave deri tek sasia e librave te lexuara, qe me kujton Distinktivin “Miku i Vogel i Librit”, flet per mungese serioziteti, qe vecse shton paqartesite.
Nqs ne shqiptaret nuk do te dime te prezantohemi dhe te mbrojme me dinjitet e besueshmeri interesat tona, apo akoma me keq nqs ne do te pranojme qe disa “argate a pupace” ne “shqip” dhe ne emrin tone t’i servirin partnereve obsionet e kunderta e te “gatuara” gjetke, e ardhmja nuk na premton asgjë të mirë.”
Kjo është deklarata e Tritan Shehut. Sa të thella qenka këto punë të cilat Kryeministri nuk i paska menduar, por opozita me sa duket nuk paska festuar as vitin e ri nga shqetësimi i thellë. E ta mendosh që edhe Tritan Shehu vetë ka qenë ministër i Jashtëm, kuptohet se çështja duhet të jetë edhe më serioze se kaq?! Përtej ironisë, një gjë është e sigurtë tashmë se beteja e re mes mazhorancës dhe opozitës, mes Kryeministrit dhe Presidentit që nuk e fsheh më që është palë me opozitën, pas dekretit për ministrin e Brendshëm vitin e shkuar, do të jetë ajo për ministrin e Jashtëm, në fillim të këtij viti. Menduat se hareja e ndërrimit të vitit do ju shoqëronte edhe në muajt në vijim? E kishit gabim, pra. Ka kush kujdeset për tjua ngrirë buzëqeshjen që më 3 janar në mëngjes. Mirëseerdhët në realitetin politik shqiptar 2019!
Përgatiti: Alpenews.al
