Një krim i dyfishtë në familje ka tronditur qytetin e Ballshit në ditën e dytë të vitit 2019. Burri ka vrarë gruan dhe motrën e saj, pas një debati në familje. Viktimat janë Gentiana Caushaj 31-vjeçe, gruaja e autorit dhe motra e saj Merisa Caushaj 18-vjeçe, ndërsa Gazment Musta 34-vjeç është arrestuar menjëherë.
Shkaku ka qënë se 31 vjeçarja ka dashur të vizitojë prinderit për festat por bashkëshorti nuk e ka lejuar.
Krimet e kulturës që po shuajnë familje!
Vrasja e Gentiana Çaushaj (31) nga bashkëshorti Gramos Musta (34) dhe e motrës së saj Merisa (18) në Ballsh, nuk është një “krim banal”. As vrasje për “motive të dobëta” apo “motive të shëndosha”. Këto dhe qindra vrasje të tjera brenda familjes në Shqipërinë e këtyre 30 viteve, janë krime kulture e civilizimi. Sot vrasja kishte si “shkak” moslejimin e gruas për të shkuar te nëna. Vitin e shkuar (10 gusht) Ritvan Zyka vrau 8 veta të fisit në Resulaj të Selenicës, se e akuzuan për vjedhje pulash. Të tjerë kanë vrarë për motive të ngjashme e deri për një hu’ gardhi, një fjalë goje apo, për një shikim… Këto krime në një shtet të hapur, janë produkt i një pjese të shoqërisë së mbyllur. Produkte të ndeshjes së kulturës së vjetër neotomane, me kulturën e re europiane. Kulturës patriarkale, me kulturën perendimore. Kulturës të së shkuarës, me kulturën e së ardhmes. Jemi në 2019 dhe ndoshta është koha për një debat kombëtar, një zgjim të ri, për të lënë pas një periudhë që ka sjellë kaq shumë viktima brenda familjeve shqiptare.
/AlpeNews.al
