Presidenti Meta i ftuar sot në emisionin “Opinion” të Blendi Fevziut ka rrëfyer edhe raportet e tij me kryebashkiakun e Tiranës, Erion Veliaj.
“Kam raporte tepër korrekte me të gjithë. Dhe me kryetarin e Bashkisë së Tiranës është një bashkëpunim institucional”, – është shprehur Meta.
Mandej ka shtuar se: “Unë për aq sa më lidh kjo punë, mund them se Bashkia e Tiranës ka bërë një punë shumë të mirë për ‘Aleancën për Dhurimin e Gjakut”’ Ka pasur një angazhim shumë të mirë, si asnjë bashki tjetër mund të them, deri tani. Dhe kjo për mua është shumë pozitive”.
PJESË NGA INTERVISTA
BLENDI FEVZIU: Thonë që ju keni një dobësi – po e quaj në thonjëza “dobësi”, – për Erion Velinë. A është e vërtetë?
PRESIDENTI META: Se çfarë thonë, nuk e di.
BLENDI FEVZIU: Unë e kam për detyrë t’ju them ato që thonë.
PRESIDENTI META: Kam raporte tepër korrekte me të gjithë. Dhe me kryetarin e Bashkisë së Tiranës është një bashkëpunim institucional.
BLENDI FEVZIU: Përtej institucionalit, a mendoni se është duke punuar më mirë apo keni një raport më të afërt me të se sa me Kryeministrin?
PRESIDENTI META: Këtë e gjykojnë qytetarët. Unë për aq sa më lidh kjo punë, mund them se Bashkia e Tiranës ka bërë një punë shumë të mirë për “Aleancën për Dhurimin e Gjakut”. Ka pasur një angazhim shumë të mirë, si asnjë bashki tjetër mund të them, deri tani. Dhe kjo për mua është shumë pozitive. Për çështjet e tjera le të gjykojnë qytetarët, nuk është e drejta ime.
