Eleni Theocharous, politikane qipriote, anëtare e Parlamentit Europian, u shpall “non grata” nga qeveria shqiptare një ditë më parë. Vendimi, sipas Tiranës vjen pasi Theocharous, që mori pjesë të enjten në ceremoninë mortore të Kostandinos Kacifas, lëshoi thirrje ekstremiste. Emri i saj është lakuar edhe më herët, madje janë shënuar edhe përplasje që kanë çuar në arrestime apo kërkesa për arrestim.
Azerbajxhani ka lëshuar në vitin 2017 një urdhërarresti ndërkombëtar në emër të saj, por Interpoli e kishte refuzuar këtë kërkesë. Sipas qeverisë së Bakusë, ajo kishte vizituar zonën e Nagorni-Karabakhut ilegalisht. Nagorni-Karabakh është një territor i diskutueshëm, por që ndërkombëtarisht njihet si pjesë e Azerbajxhanit. Eleni Theocharous është një nga 450 politikanët, gazetarët, akademikët apo artistët që janë përfshirë në “listën e zezë” të Azerbajxhanit.
Eurodeputetja qipriote ka po ashtu lidhje të ngushta me Rusinë dhe ishte e vetmja nga radhët e Parlamentit Europian që vëzhgoi zgjedhjet ruse të zhvilluara në Krime, më 18 mars 2018.
