Gazetari investigativ, Artan Hoxha zbardh detaje të reja nga zbulimi i laboratorit të heroinës në Has javën e kaluar. I ftuar në studion e Report Tv, gazetari tha se ka qenë një informacion i marrë nga policia lokale që çoi në sekuestrimin e punishtes së drogave të forta, brenda të cilit u gjetën 182 kg opium dhe morfinë e cila shërben si lëndë e parë për prodhimin e heroinës. Gjithçka nisi nga furgoni i 76-vjeçarit Mustafë Shuti, i cili u la në arrest shtëpie nga Gjykata e Kukësit.
“Shkoni dhe kontrolloni furgonin e Mustafë Shutit’, ky ishte informacioni që iu dha policisë lokale dhe më pas nga aty nisi e gjithë kjo zanafillë që çoi në zbulimin e laboratorit të heroinës në Has.”
Gazetari Hoxha zbulon gjithashtu se laboratori kishte vetëm pak ditë që ishte vënë në punë, ndërsa pajisjet ishin blerë në një Qendër Tregtare. Furgoni me pajisje kishte udhëtuar në drejtim të Hasit vetëm tre ditë përpara se të zbulohej nga policia.
“Pajisjet janë blerë të hënën në datë 15 tetor në një Qendër Tregtare në Tiranë. Në datën 16 furgoni është nisur nga Tirana për në Has dhe në datën 19 u zbulua laboratori i heroinës”.
