Duket se kalimi i kreut të PDIU-së Shpëtim Idrizit në opozitë, nuk është pritur mirë edhe nga aktorë të tjerë të politikës.
Kjo lëvizje ngriti shumë pikëpyetje nëse Vangjel Dule do të qëndronte akoma, apo jo, në frontin opozitar, për shkak të përplasjeve të tyre.
Por i ftuar në studion e “Top Talk”, kryetari i grupit parlamentar të Partisë Demokratike, Edi Paloka, tha se të dy liderët e partive janë sa për të rrëzuar Ramën nga pushteti.
“Nuk ekziston më kushtëzimi mes PDIU dhe PNDNJ. Fronti opozitar që është ngritur sot nuk është fronti që do të qeverisë nesër.
Ky është fronti që do të rrëzojë Edi Ramën. I gjithë sfondi politik, bashkë me qytetarët janë të bindur se Rama duhet larguar sa më parë.
Pasi të largohet Rama do të krijohen kushtet për zhvillimin e zgjedhjeve të lira, ku çdo parti do të zgjedhë koalicion, programin.
E natyrshëm s’mund të ngatërrohen dy parti që kanë programe të ndryshme nga njëri-tjetri. Sot kemi një front kundër Ramës.
Nesër çdo parti do të hyjë në zgjedhje me koalicionin e saj dhe me programin e saj do të përpiqet të marrë votat e shqiptarëve”, tha Paloka.
