Pas ngjarjes së rëndë të ndodhur në orët e para të mëngjesit të sotëm në fshatin Remas të Divjakës, familja Lika jep një version ndryshe nga policia. Sipas tyre, në orët e para të mëngjesit të sotëm, forcat RENEA i janë drejtuar banesës së shtetasit Haxhi Lika dhe kanë qëlluar me armë zjarri në drejtim të saj.
Për pasojë, ka mbetur i plagosur me plumb në kokë 77-vjeçari Haxhi Lika, i cili ndodhet në spitalin e Traumës në Tiranë.
Ishte ora 04:00 e mëngjesit kur forca të shumta policie dhe RENA zbarkuan në fshatin Remas të Divjakës, ndërsa thuhet se ishin në kërkim të dy personave të kërkuar për vrasje. Por në rrethana ende të paqarta, mbeti i plagosur rëndë një 77 vjeçar.
“U terrorizuam. Dëgjuam krisma armësh dhe u zgjuam nga gjumi. Na njoftuan se ishte plagosur xhaxhai në kokë”. Kështu deklaron në një intervistë për Agjencinë e lajmeve ‘BalkanWeb’ Haziz Lika, nipi i Haxhi Likës.
Teksa tregon momentet e tmerrit, Hazizi pohon se dëgjuan dy të shtëna me armë, ku një prej plumbave që sipas tij u lëshuan nga forcat RENEA, kapën plakun që po flinte në dhomë. Sipas nipit, plumbi e kapi të moshuarin në ballë. Po ashtu ai bëri të ditur se dy djemtë e xhaxhait të tij, (djemtë e Haxhi Likës) janë shoqëruar në polici. “BalkanWeb” mëson se bëhet fjalë për Arben dhe Martin Likën, 45 dhe 51 vjeç.
