Ish-kryeministri Sali Berisha në një mesazh ngushëllimi për familjen e Adem Demaçit, e ka cilësuar atë ‘Mandel i Europës’.
POSTIMI I BERISHËS
Te dashur miq, sot kombi ynë është ne dhimbje dhe zi!
Adem Demaçi, ikona e përpjekjeve, qëndresës të pamposhtur të shqiptareve të Kosovës për liri dhe dinjitet kombëtar, Mandela i Europës, burri që kaloi 28 vite në burgjet e pushtuesve barbar në luftën e tij heroike kundër aparteidit dhe segregacionit serb ndaj shqiptareve, nuk është më!
Adem Demaçi, për qëndresën dhe sakrificat e tij si luan i lirisë të shqiptarëve të Kosovës, u bë një emër i njohur në Europë dhe mbarë botën. Parlamenti Europian në vitin 1991 e nderoi atë me çmimin ‘Saharov’.
Pas vitit 1990, Demaçi bashkëpunoi ngushtë me Presidentin Rugova dhe në krye të Këshillit për të Drejtat dhe Liritë e Njeriut ai u dëshmua një avokat i fuqishëm i lirive dhe te drejtave të qytetarëve të shtypur shqiptar të Kosovës.
Gjatë viteve të luftës çlirimtare, Adem Demaçi ishte jo vetëm zëdhënësi, por dhe personaliteti më i njohur i saj në botë. Në vitet 1991-1998 pata fatin të punojmë si miq nga afër së bashku për çështjen kombëtare. Adem Demaçi ishte gjithashtu një shkrimtar, që me veprat e tij u bë i njohur në letrat dhe kulturën shqiptare.
Duke ndarë dhimbjen dhe zinë me familjaret, miqtë, popullin dhe autoritetet e Kosovës dhe mbarë shqiptarët dhe shprehur atyre ngushëllimet më të ndjera për këtë humbje të madhe, shpreh dhe një herë nderimin më të madh dhe mirënjohjen më të thellë ndaj burrit, që me qëndresën e tij në kufijtë e legjendës na dha kaq shumë nder dhe krenari si shqiptare!
I lehtë qoftë për ju Adem Demaçi, luftëtar i paepur i lirisë, dheu i tokës tonë!
