Këshilli Bashkia i Tiranës i hap rrugën gjatë kësaj jave kredisë së butë për strehimin edhe të 1000 familjeve të tjera gjatë vitit 2018. Vendimi pritet të meret gjatë mbledhjes së radhës së Këshillit Bashkiak që do të mbahet të enjten e javës që vjen, datë 29 mars 2018 ora 11.00.
Burimet nga ky Këshill i thanë Alpenews.al se kjo pikë ështe e shtata në rendin e ditës, por që për nga interesi publik dhe nevojat e qytetarëve duket se mund të jetë pika e parë. Pasi është shumë i madh numri i familjeve që kanë nevoja emergjente strehimi në kryeqytet ku sipas Kryetarit të Bashkisë së Tiranës Erion Veliaj, duhen çdo vit në total 7 000 apartamente të reja, si nevojë dhe kërkesë e tregut. Nga të cilat 1000 i suporton bashkia për familjet më të pamundura, ndërsa të tjerat përballohen nga vetë qytetarët sipas rregullave të ekonomisë së tregut, me anë të kërkesë- ofertës.
Ata që kërkojnë të përfitojnë nga programi social i strehimit dhe i subvencionimit të interesave të kësaj kredie nga Bashkia e Tiranës, duhet të njihen me formularët e pikëzimit që duhet të sigurojnë, të cilat publikohen ekskluzivisht nga Alpenews.al.
Besohet se pas miratimit nga Këshilli Bashkiak i Tiranës, në prill me konfirmimin e këtij vendimi edhe nga Prefektja e Tiranës, hapet zyrtarisht aplikimi për të përfituar nga kjo kredi e butë dhe brenda një muaji nga ky moment, duhen plotësuar dhe dorëzuar formularët në bashki. Aty më pas del lista paraprake sipas pikëve dhe shpallet lista e fituesve përsëri nga Këshilli Bashkiak i Tiranën, në një mbledhje tjetër.
Brenda gjashtë muajve të tjerë gjatë këtij viti kalendarik, përfituesit kanë kohë që të gjejnë shtëpinë në treg dhe të aplikojnë për marrjen e kredisë derisa shtëpia të bëhet pronë e tyre edhe me letra e të vijojnë të banojnë atje, duke shlyer kredinë në vijimësi.
Përgatiti: Alpenews.al
