Blerim Qarri është shqiptari i cili gjeti vdekjen tragjike ditën e djeshme në Santorini të Greqisë.
21-vjeçari nga Hasi kishte 7 muaj që kishte shkuar si emigrant në ishullin grek për të siguruar një jetesë më të mirë për familjen e tij.
Burimet bëjnë me dije se ai jetonte në një shtëpi me qira me një mikun e tij dhe ishte një punëtor i thjeshtë në ndërtim.
Aksidenti që i mori jetën ndodhi mbrëmjen e djeshme rreth orës 20:30 minuta ndërkohë që ai ishte duke u kthyer në shtëpi. 
I riu u përplas nga një makinë, drejtuesi i së cilës ishte grek dhe po udhëtonte me një shpejtësi tej normave të lejuara.
Sipas burimeve për redaksinë tonë, greku që i shkaktoi vdekjen të riut shqiptar, punon si polic privat në aerodromin e Santorinit, aktualisht ecën i lirë dhe po pret datën e gjyqit.
Qarri ishte i fejuar me një vajzë të quajtur Elda, e cila për disa ditë festonte edhe ditëlindjen.
E fejuara e tij e cila aktualisht është edhe studente në shkollë të lartë është njoftuar mbi lajmin e kobshëm mbrëmjen e djeshme.
Shqiptari ishte shtylla e familjes dhe ishte detyruar të migronte në vendin e huaj për kushte më të mira ekonomike.
