Agjencia Sekrete e Sigurisë së Rusisë është e njohur në mbarë botën për operacionet e saj të inteligjencës kundër terrorizmit. FSB, Shërbimi Federal i Rusisë, i ka rrënjët në policinë sekrete të KGB së Bashkimit Sovjetik. Ajo është krijuar në vitin 1995 si agjencia inteligjente e Rusisë për të trajtuar kërcënimet ndaj shtetit rus. Presidenti Vladimir Putin drejtoi FSB-në përpara se të vinte në pushtet.
Shërbimi Federal i Rusisë është përfshirë në luftën kundër separatistëve nga Çeçenia në fillim të viteve 1990 dhe viteve 2000. Një pjesë e punës së FSB është të parandalojë edhe çdo kryengritje pro-perëndimore në Rusi, si Revolucioni i Gjeorgjisë në vitin 2003 dhe Revolucioni i Ukrainës në vitin 2004.
FSB është vënë në qendër të vëmendjes ndërkombëtare edhe për ish-agjentët e saj të gjetur të vrarë. Alexander Litvinenko, ish-oficer i FSB dhe kritik i ashpër i Presidentit Putin, u helmua me polonium radioaktiv, në Londër në vitin 2006. Litvinenko kishte përfituar azil në Britaninë e Madhe dhe ishte konsideruar tradhtar në Rusi. Autoritetet britanike dolën në përfundimin se vrasësit e ish-oficerit të FSB-së mund të kishin marrë miratimin nga Presidenti Putin dhe shefi i FSB, Nikolai Patrushev. Rusia i hodhi poshtë këto akuza. Alexander Litvinenko kishte akuzuar Shërbimin Federal të Rusisë se kishte krijuar një skuadër sekrete të quajtur URPO, për të vrarë armiqtë e Vladimir Putin. Një nga objektivat e URPO, tha Litvinenko në atë kohë, ishte oligarku Boris Berezovski, i cili vdiq në Britaninë e Madhe në vitin 2013. Vdekja e tij u konsiderua vetëvrasje.
- Lidhja Putin – FSB
Selia e FSB në qendër të Moskës është Lubjanka. Në këtë ndërtesë, KGB-ja merrte në pyetje të burgosurit politikë në kohën e Bashkimit Sovjetik. Kreu i FSB-së, Alexander Bortnikov i raporton direkt Presidentit rus Vladimir Putin. Në vitet 2000, për t’u bërë President, Putin i dha postet më të mira ish-spiunëve nga Shën Petersburg. Gjatë mandatit të tij të parë si President, 1/3 e zyrtarëve qeveritarë ishin agjentë ose ish-agjentë të FSB. Pjesa më e madhe e tyre, tani janë subjekt i sanksioneve të BE-së dhe SHBA-së pas aneksimit të Krimesë nga Rusia në vitin 2014. Këta zyrtarë ish-spiunë, kontrollojnë sot burime kryesore ruse.
