Ka marrë fund arratia e Kevin Margjonit. 49-vjeçari, i shpallur në kërkim ndërkombëtar në kuadër të hetimeve për laboratorin e kokainës në Frakull të Fierit, është arrestuar në Spanjë me qëllim ekstradimin drejt Shqipërisë. Arrestimi i tij u bë i mundur falë bashkëpunimit të Interpol Tiranës me homologët në Madrid.
Kevin Margjoni ishte shpallur në kërkim pasi ndaj tij, Gjykata e Posaçme kundër Korrupsionit dhe Krimit të Organizuar kishte caktuar masën e sigurisë “Arrest në burg” për veprat penale “Trafikimi i lëndëve narkotike”, kryer në bashkëpunim në formën e grupit të strukturuar kriminal, “Grupi i strukturuar kriminal” si dhe “Kryerja e veprave penale nga organizata kriminale ose grupi i strukturuar kriminal”.
Arrestimi i Margjonit vjen në një kohë kur hetimet për dosjen e laboratorit të drogës në Frakull kanë marrë zhvillime të reja. Vetëm një ditë më parë, Prokuroria e Posaçme u dha statusin e bashkëpunëtorit të drejtësisë dy prej të pandehurve të këtij procedimi penal, një shtetasi të huaj dhe një shqiptari, identitetet e të cilëve mbahen sekret për shkak të hetimeve.
Sipas burimeve, bashkëpunëtorët kanë dhënë episode dhe emra të rinj të personave të përfshirë në aktivitetin kriminal. Deri më tani, në kuadër të tre procedimeve penale, janë identifikuar mbi 15 persona. Hetimet kanë nisur që në vitin 2022, pas zbulimit të laboratorit të përpunimit të kokainës në banesën e familjes Çervanaku në Frakull të Fierit, ku u sekuestruan mbi 480 kilogramë kokainë. Dyshohet se lënda narkotike ishte sjellë nga Kolumbia dhe ishte fshehur në një ngarkesë me pleh organik artificial.
Në kuadër të kësaj dosjeje janë arrestuar Klevent Gjolena, Aldi Zonja dhe Musa Gjikola, ndërsa Kevin (Arjan) Margjoni dhe Durim Keçi ishin shpallur në kërkim. Prokuroria e Posaçme kishte vendosur më 13 janar ndarjen e akteve të procedimit penal dhe vijimin e hetimeve për veprat penale “Trafikimi i lëndëve narkotike”, “Prodhimi dhe shitja e narkotikëve”, “Grupi i strukturuar kriminal” dhe “Kryerja e veprave penale nga organizata kriminale ose grupi i strukturuar kriminal”.
Operacioni për laboratorin e Frakullës konsiderohet një nga goditjet më të mëdha ndaj trafikut ndërkombëtar të kokainës në Shqipëri. Më 24 nëntor 2022, në Frakull të Madhe të Fierit, u arrestuan, u proceduan apo u shpallën në kërkim disa persona, mes tyre ish-kryekomunari Viktor Çervanaku, Nikolin Gjolena, Denilson Çervanaku, Klajdi Vrioni alias Klajdi Kodra, Zenel Çervanaku, Redion Meshi, Enxhi Ferhati, Marildo Rona, Bledar Matoshi dhe Julian Malaj.
Për këtë dosje janë dhënë në total 88 vite burg, ndërsa vijon ende gjykimi ndaj kolumbianit Samir Rosales Rodriguez. Ndërkohë, hetimet vazhdojnë edhe për një fraksion tjetër të grupit kriminal, i cili dyshohet se sillte kokainë nga Amerika Latine të fshehur në lëkurë gjedhësh dhe e përpunonte në tre laboratorë të zbuluar në Shqipëri. Për këtë operacion ishin shpallur në kërkim Durim Keçi dhe Kevin (Arjan) Margjoni, ky i fundit tashmë i arrestuar në Spanjë.
