Një proces gjyqësor që mund të ndikojë drejtpërdrejt në të ardhmen e inteligjencës artificiale nis këtë të martë në Kaliforni, ku miliarderët Elon Musk dhe Sam Altman do të përballen në gjykatë për transformimin e kompanisë OpenAI nga një organizatë jofitimprurëse në një gjigant fitimprurës të teknologjisë.
Sipas padisë civile të ngritur nga Musk, drejtuesit e OpenAI, Sam Altman dhe Greg Brockman, kanë tradhtuar misionin fillestar të kompanisë, që sipas tij ishte krijimi i inteligjencës artificiale në dobi të njerëzimit dhe jo për përfitime financiare.
Musk pretendon se OpenAI është kthyer në një “makinë fitimi” për drejtuesit dhe investitorët e saj. Ai kërkon 150 miliardë dollarë dëmshpërblim nga OpenAI dhe Microsoft, një nga investitorët kryesorë të kompanisë, duke kërkuar që fondet t’i kalojnë degës bamirëse të OpenAI.
Po ashtu, ai kërkon që OpenAI të rikthehet në statusin jofitimprurës dhe që Altman e Brockman të largohen nga drejtimi i kompanisë.
Nga ana tjetër, OpenAI ka kundërshtuar akuzat, duke pretenduar se Musk ishte në dijeni dhe mbështeti transformimin e kompanisë, por u kthye kundër saj pasi nuk arriti të merrte drejtimin e OpenAI dhe pasi krijoi kompaninë e tij të inteligjencës artificiale, xAI.
Në gjyq pritet të dëshmojnë vetë Elon Musk, Sam Altman dhe CEO i Microsoft, Satya Nadella. Vendimi mund të merret brenda mesit të muajit maj.
Ekspertët paralajmërojnë se ky proces mund të ndikojë jo vetëm në planet financiare të OpenAI, por edhe në mënyrën se si publiku e percepton zhvillimin e inteligjencës artificiale në të ardhmen.
Burimi: Reuters
