Pronari i “Lufa Print” në Shkodër ku u vendos tritoli, Lulzim Mehmeti ka dhënë dëshminë e tij për policinë vendore. Mehmeti pas ngjarjes së rëndë të shpërthimit me eksploziv deklaroi se nuk ka probleme me askend dhe se nuk ka patur kërcënime apo shqetësime të tjera gjatë gjithë kësaj periudhe si dhe ka deklaruar se gjatë gjithë ditës ndodhej në banesë për shkak të një viroze.
“Nuk e kam idenë se kush e ka vendosur sasinë e eksplozivit. Nuk kam patur asnjëherë probleme me askend, as kërcënime dhe asgjë tjetër të këtij lloji. Ne operojmë prej shumë vitesh në fushën e reklamave dhe marketingut në Shkodër dhe nuk e di përse është vendosur tritoli pranë subjektit tim. Gjatë gjithë ditës thuajse isha në shtëpi për shkak të një viroze. Nuk kam asnjë ide se kush mund të jenë autorët”, mësohet të ketë deklaruar pronari i “Lufa Print”.
Policia vendore e Shkodrës bashkë me prokurorinë kanë nisur hetimet intensive për zbardhjen e ngjarjes së ndodhur. Eksplozivi ka tronditur të gjithë zonën aty përreth për shkak të zhurmës së fortë që ka patur edhe pse nuk ka qenë në një sasi shumë të madhe.
Efektivët kanë marrë njoftim rreth orës 22:20 për ngjarjen e ndodhur dhe menjëherë janë drejtuar drejt zonës së Ish Fermentimit ku ndodhet subjekti që u sulmua. Policia ka sekuestruar kamerat e sigurisë nga të cilat rezulton se dy persona që nga pamjet duke të një moshe shumë të re afrohen me motor dhe pasi hedhin tritolit pranë qepenave të “Lufa Print” largohen me shpejtësi. Autorët kanë të veshur një bluzë me kapuç dhe kanë të mbuluar fytyrën për të mos u identifikuar.
Pas shpërthimit, autorët ende të paidentifikuar largohen në drejtim të njësisë Rrethina në një zonë rurale ku nuk ka kamera sigurie për të mos lënë gjurmë. Ajo që dyshohet nga policia është se dy të rinjtë mund të jenë përdorur me pagesë në këtë ngjarje për vendosjen e tritolit. Uniformat blu të Shkodrës janë duke hetuar çdo pistë të mundshme lidhur me këtë ngjarje të rëndë të ndodhur mbrëmjen e 9 dhjetorit në Shkodër për identifikimin e autorëve, gjetjen dhe kapjen e tyre.
