Ministri i Jashtëm, Igli Hasani, njoftoi sot për përfundimin me sukses të procesit të evakuimit të pesë shqiptarëve nga Izraeli, pas përshkallëzimit të konfliktit me Iranin.
Përmes një postimi në rrjetet sociale, Hasani bëri me dije se Ministria e Punëve të Jashtme, përmes ambasadave në zonë, ka ndjekur nga afër çdo etapë të këtij operacioni. Pesë shqiptarët mbërritën të sigurt në orët e para të mëngjesit në Athinë.
Tre prej tyre kanë vazhduar udhëtimin dhe tashmë ndodhen në Tiranë, ndërsa një person tjetër pritet të mbërrijë në Shqipëri sonte në mbrëmje. Personi i pestë, që është rezident në Greqi, do të qëndrojë atje për momentin.
Ky operacion vjen në një kohë kur tensionet mes Izraelit dhe Iranit janë përshkallëzuar, duke rritur shqetësimet për sigurinë e qytetarëve shqiptarë në rajon.
