Gjykata e Tiranës konfirmoi masat e sigurisë “arrest në burg” për pesë kolumbianet e arrestuara të enjten nga operacioni “Orkidea”, si pjesë e një rrjeti prostitucioni në kryeqytet.
Në seancën e zhvilluar me dyer të mbyllura pesë shtetaset kolumbiane, i thanë gjykatës se kishin ardhur në Shqipëri përmes një agjencie punësimi për arsye ekonomike, pasi vinin nga divorce në vendin e origjinës, por kanë mohuar të ishin pjesë e ndonjë rrjeti prostitucioni. Ndonëse kanë pranuar të jenë përfshirë në këtë aktivitet duke u regjistruar në faqet e eskortave në Instagram, për llogari personale të tyre, ato janë shprehur se nuk e dinin që prostitucioni ishte vepër penale në Shqipëri.
Masa e sigurisë “arrest në burg” qëndroi e pandryshuar edhe për taksistin Esmerald Sulollari, ndërsa për të dyshuarat Anisa Brahaj, oficere krimesh në Komisariatin nr. 4 dhe Elona Murajn, gjykata vendosi të vijojë masa e “arrestit në shtëpi”. Sipas burimeve brenda seancës, taksisti Sulollari ka kundërshtuar akuzën, duke pretenduar se ka bërë vetëm punën e tij të taksistit.
Ai ka pranuar se ka transportuar vajzat nga Rinasi drejt Tiranës, në këmbim të pagimit të tarifës së taksisë. Fakti që u ka shërbyer vetëm si taksist, është konfirmuar edhe nga të dyshuarat kolumbiane në sallën e gjyqit. Nga ana tjetër, prokurori i tha gjykatës se 39-vjeçari Sulollari ka mbajtur kontakte me Gabriela Martinez, kolumbianen 47-vjeçare, të shpallur në kërkim si drejtuesja e këtij rrjeti prostitucioni në kryeqytet.
Në kodin “Orkidea”, Policia e Shtetit ekzekutoi 8 masa sigurie të enjten, nga 11 të miratuara nga gjykata mbi një rrjet të rekrutimit të vajzave nga Kolumbia, sjelljen e tyre në Tiranë dhe më pas përfshirjen e tyre në prostitucion, kundrejt tarifave nga 200 në 250 euro për çdo klient.
Prokuroria e Tiranës ka proceduar 44 vajza nga Amerika Latine si të përfshira në këtë skemë. Të dyshuarit në këtë çështje akuzohen në role të ndryshme për “shfrytëzim të prostitucionit”, “trafikim të personave të rritur”, “prostitucionin” dhe “mbajtje e lokaleve për prostitucion”.
