Shqipëria i është përgjigjur pozitivisht kërkesës së dy eurodeputetëve për ndihmë për evakuimin nga Gaza dhe trajtimin mjekësor të fëmijës 1 vjeç në QSUT i cili vuante nga probleme me infeksion pulmonar të përsëritur, mëson Report Tv.
Përgjigjen pozitive për kërkesën e partnerëve ndërkombëtare e konfirmoi dhe kryeministri Edi Rama përmes një videomesazhi në facebook ku i ktheu përgjigje një komentuesi i cili e akuzonte se po bënte propagandë
“Ajo familja që erdhi nga Gaza, erdhi me kërkesë të partnerëve ndërkombëtarë dhe si rezultat i vlerësimit për shërbimin tonë pediatrik. Disa familje, prej të cilave njëra erdhi në Shqipëri, u çuan në disa vende të Europës ku shërbimi pediatrik vlerësohet. Në vend se të bëheni përhapës të gënjeshtrave të atyre që e dini mirë kush janë, kërkojini atyre llogari se nuk i dilet me inat kësaj pune’ tha Rama
Për të është kujdesur dhe po kujdeset shefja e pavijonit në pediatrinë e QSUT-së, Mira Kola. I mituri është në gjendje të mirë shëndetësore, dhe pritet të dalë nga spitali në ditët në vijim.
Familja ka udhëtuar direkt nga Gaza në Tiranë përmes një avioni ambulancë dhe ka mbërritur në Rinas më 15 janar 2025, ndërkohë evakuimi i vogëlushit në vendin tonë u mësua dje (16 janar 2025) nga Organizata Botërore e Shëndetësisë në Shqipëri me anë të një njoftimi zyrtar.
Ndërkohë famija po strehohet në Qendrën Kombëtare Pritëse për Azilkërkuesit në Babrru, e brenda pak ditësh synohet të kaloj në një ambient më të përshtatshëm me qira në Tiranë. Janë marrë masat nga autoritetet që familja të trajtohet me psikolog përgjatë qëndrimit në Tiranë.
