Gjatë një tubimi të opozitës para bashkisë së Tiranës, disa protestues të Partisë Demokratike kanë shkaktuar një incident të pazakontë. Ata kanë ofenduar dhe larguar medalistët olimpikë që kishin ardhur për të bërë një foto përpara një baneri që mbështeste Shqipërinë në Lojërat Olimpike.
Sait Prizreni, president i Federatës së Mundjes, së bashku me Chermen Valiev dhe Islam Dudaev, mundësit që fituan medalje olimpike për Shqipërinë, si dhe Zelimkhan Abakarov dhe trajnerët Ermal Kryeziu dhe Leonard Çakmashi, ishin në vend për të realizuar një foto të përbashkët. Megjithatë, ndërsa ata po përgatiteshin për fotografinë, protestuesit i janë afruar dhe i kanë përzënë me të bërtitura.
Një video e shpërndarë në media tregon qartë skenat e tensionuara, ku protestuesit largojnë medalistët olimpikë. Në këto pamje, shfaqet edhe Sali Lusha, ish-truproja i Sali Berishës, si një nga protagonistët e ngjarjes.
