Ardjan Doçi, drejtuesi dhe njëkohësisht pronari i furgonit ku u gjetën shtatë pako me kokainë në portin e Durrësit, ka deklaruar se lëndën narkotike ia kishte marrë një personi në Tiranë, por pa dhënë identitetin e tij. Ndërsa djali i tij i tezes, Mentor Çuni ka deklaruar se s’ka pasur dijeni për drogën nën sedilje.
“Kokainën ma dha një person në Tiranë që nuk u identifikua. Pagoi paratë për transportin dhe më dha koordinatat se ku do ta çoja. Atje më tha se më priste një person që do më gjente paratë. Këtë intenerar kemi disa vite që e bëjmë, por kjo është hera e parë që mora përsipër të transportoja drogë.
Pasi e ngarkuam në Tiranë, mora kushëririn (djalin e tezes) me vete për të më ndihmuar gjatë rrugës. Fillimisht do shkarkonim disa pako në Itali, gjëra që familjarët u kishin dërguar të afërmve të tyre dhe më pas do vijonim udhëtimin drejt Anglisë. Sa i përket drogës, nuk ua di emrat as atij që ma dha dhe as atij që e priste. Vetëm koordinatat.
Thjesht mora përsipër ta transportoja. Me shpresën se nuk do më kapnin gjatë rrugës. Mentori s’ka lidhje fare pasi është thjesht punëtor dhe s’kishte dijeni për kokainën“, ka deklaruar ndër të tjera para hetuesve të policisë Ardjan Doçi.
Ndërkohë, policia ka sekuestruar telefonat celularë të të dy personave të arrestuar dhe po punon për identifikimin e personave të tjerë të përfshirë në këtë rrjet të trafikimit ndërkombëtar të kokainës.
