Kryetarja e LSI-së Monika Kryemadhi ishte e ftuara e mbrëmjes së sotme në emisionin ‘FAKT’ të gazetari Çim Peka në SYRI.net. Në intervistën e saj, Kryemadhi është shprehur se ka qenë kundër marrëveshjes me Edi Ramën në vitin 2013.
Sipas saj, Rama është i pabesë. Kryemadhi ka treguar se nuk ka qenë e pranishme në këtë takim të Metës dhe Ramës.
Kryemadhi ka bërë edhe një ftesë për kritikët e Lulzim Bashës në PD, veçanërisht Jozefina Topallin dhe Astrit Patozin.
***
INTERVISTA E PLOTË E MONIKA KRYEMADHIT NË SYRI.net
Përshëndetje, sot kam të ftuar Kryetaren e LSI, znj.Monika Kryemadhi. Jemi dy ditë para protestës së njoftuar nga opozita e bashkuar më 27 Janar. Tashmë PD dhe LSI kanë paralajmëruar një protestë të fortë kundër qeverisë Rama. Deri këtu argumentet janë se në rast se protesta do të jetë madhështore, fundi i qeverisë Rama është në 27 Janar. Znj Kryemadhi është prova e parë e PD dhe LSI të organizojë një protestë bashkë. Edhe kur kanë qenë në bashkëqeverisje në vitin 2009-2013 nuk kemi pasur nuk kemi pasur një protestë të përbashkët. A e ndjeni si sfidë pak të rrezikshme duke qenë se edhe fushata e 2017 ishte e ndërtuar më shumë sesa një fushatë e PD kundër PS, ishte e ndërtuar një fushatë e z.Basha kundër Ilir Metës, ish-kryetari i LSI. Pra a ka një risk të mos përshtatjes apo të mos rakordimit të elektoratit të LSI dhe PD për një protestë kundër Edi Ramës?
Unë nuk do ta shikoja kështu por do ta mendoja që protesta e 27 Janarit, është një protestë që nuk është e opozitës, por e të gjithë shqiptarëve të cilët duhet të dalin për një trajtim të barabartë nga qeveria e tyre. Pra Shqipëria nuk është vetëm e Rilindjes dhe e Edi Ramës por është e të gjithë shqiptarëve. Ne kërkojmë barazi, shanse të barabarta për të gjithë, siç flasin dhe ulërasin çdo ditë me ndërkombëtarët, të huaj, të brendshëm të jashtëm, flasin për shanse të barabarta në gender, ashtu duhet të flasin dhe për shanse të barabarta në të gjithë shoqërinë shqiptare, në të gjithë jetën tonë, qoftë politike dhe ekonomike. Përsa i përket bashkëpunimit tonë me PD, unë mendoj që gjërat janë shumë të vogla përpara asaj që është shumë më e madhe. Problemi kryesor i shqiptarëve sot, nuk është nëse i ka ngel hatri apo jo LSI apo PD, se ç’kanë bërë në fushatë me njëra-tjetrën apo si kanë qeverisur. Mendoj që shqiptarët kanë hall tjetër shumë më të madh, kanë mungesën e punës, e parasë për të ushqyer familjet e tyre, e shanseve dhe oportuniteteve për tu zhvilluar dhe për të ecur përpara. Kanë mungesën e një arsimi të nevojshëm që është i domosdoshëm për të cilin ata paguajnë. Mungesën e shërbimit shëndetësor, e bukës së përditshme në familjet e tyre, mungesën e shpresës për të zhvilluar të ardhmen e tyre. Unë mendoj që tashmë nëse do të fillojmë dhe do të merremi sesi ka qenë e veshur Monika apo se çfarë historie apo barcalete, kjo është shumë e vogël përpara problemeve të tjera që kanë sot shqiptarët.
Nuk po flet njeri, as për lukun as për imazhin as për tonalitetin e Lulzim Bashës apo të Ilir Metës, po flasim për një besueshmëri të shqiptarëve ndaj frontit të ri opozitar. Kur populli e thërret opozitën në shesh dhe opozita rri në shtëpi nuk është faji i popullit, është mungesa e besueshmërisë ndaj opozitës. A keni menduar se po protestoni me një risk të madh në rast se nuk ju përgjigjet populli në protestën e 27 Janarit?
Nëse mbani mend në 97, kur PD iku nga pushteti dhe u bënë zgjedhjet që vinin pas një revolte me armë të shqiptarëve. Edhe pse kishin 3-4 muaj që kishin mbaruar zgjedhjet dhe kishin një situatë pasigurie, Berisha dilte në Bulevardin Dëshmorët e Kombit, me 10-15 veta protestonte dhe vazhdonte. Dhe kjo ndodhi në vazhdimësie dhe pas 8 vitesh jo se protestoi 8 vjet rresht por pas 8 vitesh PD edhe pse iku me armë në 97 u rikthye me votë të lirë. Problemi qëndron që partitë politike këtë punë kanë edhe ato në opozitë edhe ato në pushtet. Ato që janë në pushtet bëjnë si intelektual, sikur janë babaxhanët e popullit edhe pse kanë mbi kurriz shumë gabime apo shumë mëkate dhe një varfëri e cila pllakoset çdo ditë e më shumë. Dhe opozita ka protestën dhe fjalën për të sensibilizuar njerëzit. Nëse nuk do ishte opozita do merrnin vesh shqiptarët që dhënia e shëndetësisë me konçension është vjedhje për shqiptarët? Jo. Nëse nuk do kishte opozitë do merrnin vesh shqiptarët që dhënia me konçension e sigurisë ushqimore është super vjedhje dhe shkatërrim i biznesit të vogël.
Çështja e të pasurit opozitë është zgjedhur në këtë vend më 8 Dhjetor 1990…
Ne e dimë shumë mirë, tentativat që ka bërë Edi Rama për të blerë opozitën dhe që vazhdon. Problemi është që ti akoma nuk ke konsoliduar një opozitë të fortë..
Ka zyrtarisht opozitë apo keni bindjen se ka moralisht opozitë në këtë vend?
Të dyja bashkë, zyrtarisht nuk të mungon opozita por problemi është çfarë veprimi dhe çfarë aktiviteti bën opozita. Cili është morali i opozitës.
A ka opozitë morale në këtë vend znj. Kryemadhi?
Unë mendoj që morali i opozitës, nuk po them e moralshme apo e pamoralshme sepse vetë politika është e amorale. Unë mendoj që opozita ka moral. Nëse unë do ngrihesha dhe do ti ftoja shqiptarët hajde në opozitë sepse kanë hequr 10 veta nga puna për shkak të bindjeve të tyre politike për mua do të ishte një kërkesë e pamoralshme. Unë po duhet të jem pjesë e suportit të atyre njerëzve. Nëse unë do ti bëj thirrje njerëzve që hajde shkojmë protestojmë në Verri në Fier atje ku po kërkohet të ngrihet inçeleratori i plehrave, unë nuk mendoj që kjo është e pamoralshme. Dhe këtu nuk ka të bëjë bindja ime politike por sensibilizimi që Shqipëria të mos kthehet në një varrezë plehrash. Përveçse ia kemi marrë çdo gjë tani edhe atë tokë që i ka ngelur ta helmojmë. Në qoftë se unë do ti them shqiptarëve çohuni se po ikin gjithë brezi i ri, gjithë fuqia punëtore që janë shumë të rëndësishme. Hajde të ngrihemi dhe të protestojmë, mos ta lëmë që të ketë këtë hemorragji të trurit dhe të fuqisë punëtore nga Shqipëria unë nuk mendoj që kjo është e pamoralshme. Mendoj që është shumë e moralshme. Problemi qëndron që morali im si opozitë është në momentin që unë ulem në tavolinë, ku do shkoj, ku do të qëndroj, këtu është problemi. A do të bëj unë kompromis me vlerat dhe me principet e forcës time politike por jo vetëm forcës time politike por dhe shumë njerëzve të cilët na përkrahin, në kurriz të pushtetit, në kurriz të gjithë këtyre përkrahësve për pushtetin. Këtu qëndron pastaj morali i opozitës. Në momentin që opozita i ngre vlerat e opozitës, forcave të saj politike, në momentin që opozita bashkon grupet e interesit, qoftë biznesin e vogël, qoftë ushtarakët e liruar, qoftë policët e liruar në mënyrë të padrejtë, viktimat e dhunës, fermerët, blegtorët.
Monika Kryemadhi si Kryetare e LSI është realisht shumë e ashpër dhe shumë më kritike në disa momente dhe se Kryetari i partisë më të madhe të opozitës por shumë më e ashpër se ish-paraardhësi i LSI, z.Ilir Meta. Jeni shprehur disa herë se Edi Rama është rrezik kombëtar. Kur e keni krijuar këtë bindje?
Unë e kam pasur bindjen shumë kohë më para. Edhe pse nuk kam qenë dakord përsa i përket marrëveshjes të PS me LSI, duke pasur parasysh personin të cilin e drejton PS nuk kam qenë dakord sepse ka treguar historikisht që është njeri që nuk i qëndron marrëveshjeve nëse i rrezikohet pushteti i vetes së tij jo i socialistëve.
Nuk keni qenë dakord për marrëveshjen e 2017 apo 2013?
2013.
Keni qenë kundra në 2013 për marrëveshjen me Edi Ramën?
Po. Po të keni parasysh fushatën time në Lezhë në 2013 është një fushatë nga më të egrat që bëhej midis PS-LSI. Nuk bëhej PD-PS
Megjithëse thuhet se kjo marrëveshje është bërë në shtëpinë tuaj dhe të Ilir Metës znj. Kryemadhi…
Po pa praninë time, shtëpia nuk është vetëm e imja, është dhe Ilir Metës. Nuk keni pasur raste ju që gruaja nuk ka qenë në shtëpi dhe ty të ka ardhur një shok keni bërë muhabet.
Shumë raste, por në darkën e famshme, nuk keni qenë prezente?
Jo.
Nuk ka qenë, Ilir Meta, Monika Kryemadhi, Linda Rama dhe Edi Rama?
Jo, Vetëm Meta-Rama dhe Nar Koka.
I vetmi dëshmitar është Nar Koka?
Edhe unë e kam marrë vesh nga mediat jo nga Ilir Meta që është takuar me Edi Ramën.
A keni tentuar të bindni ish-kryetarin e LSI, bashkëshortin tuaj se me Edi Ramën duhet të ndaheshit më përpara gjatë vitit 2013-2016? Cili ka qenë reagimi i z.Meta?
Shumë herë. Meta është personazh i çuditshëm politik, përballë stabilitetit politik dhe të vendit të gjitha gjërat e tjera i bën zero. Pra ai mund të pranojë që edhe të vetë sakrifikohet në momentin që vetë sakrifikimi i tij sjell një lloj stabiliteti në Shqipëri. Por faktikisht kjo ka vlerë kur ke politikanë të mirëfilltë dhe që e duan vendin. Por në momentin që ke përballë një njeri që vetëm vendin e tij nuk e do, por vetëm karrigen ku ai ul të ndenjurat e veta atëherë nuk mund të ketë vlerë kjo. Meta mendoi që këtë që realizoi pra këtë marrëveshje që bëri me z. Rama për shkak të stabilitetit për shkak të marrëveshjes natyrale të LSI me PS, sesi dy forca të ishin më pranë njëra tjetrës por që në zbatimin e programit edhe pse u shkruajt një program i jashtëzakonshëm prej 150 faqesh në 2013 nuk u zbatua absolutisht. Pra qoftë kur vinte çështja përsa i përket ndihmës së biznesit, krijimit të klimës së biznesit e shumë e shumë gjëra të tjera rezultoi që marrëveshja me ta ishte e pazbatueshme. E para dhe e dyta pjesa tjetër pastaj vazhdon që hap pas hapi të gjitha veprimet e Ramës tregonin që jo vetëm nuk mund të jetë një bashkëluftëtar i yti ose shoku yt i krahut në betejë në llogore por përkundrazi mund të jetë shoku që të vret mbrapa shpine. Ashtu sikurse edhe për të arritur për të bërë një politikë të mirëfilltë përsa i përket në ndihmë të shtresave në nevojë. U kthye në të kundërt sepse u kthye në ndihmesë të 4 ose 5 klientëve të z.Rama të cilët sot janë oligarkët e Shqipërisë dhe faktikisht menaxhojnë gjithë jetën ekonomike shqiptare.
Mënyra sesi po e përkufizoni Ilir Metën ngjason me një burokrat Brukseli i cili ndërmjet burokracisë dhe stabilitetit zgjedh stabilitetin znj. Kryemadhi a e keni thënë këtë?
Është në nga njerëzit që e ka aspiruar gjithën jetën e tij politike integrimin e Shqipërisë në BE. Është europianist europianist në mendime, po edhe mund ta pyesni atë vetë sepse unë them si e shikoj unë Ilir Metën sepse ai mund të jetë ndryshe në mendimin e tij.E shikoj një nga politikanët më tolerantë që ka pasur Shqipëria se të më bëjë mua Edi Rama ato që i ka bërë Ilir Metës nuk ka shanse. Megjithatë është një shtetar se ka dhe një fjalë tjetër të urtë. I forti fal dhe kjo është dhe një nga gjërat që e bën Ilir Metën ndryshe nga politikanët që ne kemi parë rëndomtë në këto 27 vite tranzicion.
Megjithatë në politikë të fortë të bëjnë numrat znj.Kryemadhi. Më të fortë se Edi Rama ky vend nuk ka pasur ndonjëherë…
Numrat mund të të bëjnë për momentin se i ka numrat Edi Rama por dil tako shqiptarët sot se çfarë flasin për Edi Ramën. I ke të gjithë që mallkojnë nga mëngjesi në darkë se nuk arrijnë dot të çojnë fëmijët e tyre në shkollë, i çojnë pa ngrënë mëngjesin ose i kanë vënë në gjumë pa ngrënë darkën. Ka një mjerim të jashtëzakonshëm që edhe Migjeni nuk do të gjente dot fjalë ta përshkruante mjerimin që ka përfshirë sot Shqipërinë. Mos të shikojmë qendrën e Tiranës, bllokun ku jetojmë ne dhe që bëjmë teatrot e radhës por duhet të dalim nëpër fshatra dhe të shikojmë se në ç’mënyrë të tmerrshme jetojnë.
Znj. Kryemadhi unë pretendoj se futem te gazetarët që njeh më mirë PD dhe LSI. Duhet të jemi realist nga 2013-2017 Lulzim Basha vuajti shumë për të krijuar profilin e tij politik sepse perceptimi i përgjithshëm ndoshta edhe me vend është se ishte i emëruari i Sali Berishës apo i përzgjedhuri i tij në krye të PD. Dhe hija e Berishës deri vonë mbizotëroi mbi Lulzim Bashën. Për të njëjtën gjë ka një perceptim tashmë për LSI. Që Ilir Meta ndihmoi për të marrë drejtimin e partisë Monika Kryemadhin. A mund të mundet Edi Rama me dy partitë e opozitës kur në perceptim dy kryetarët e saj kur janë të emëruarit e dy ish-Kryetarëve të vjetër?
Ky lloj perceptimi që thoni ju është një lloj perceptimi që sponsorizohet nga Edi Rama. Mos harro që janë hedhur me miliona euro për ta pasur një perceptim të tillë, për të blerë media, gazetarë, deputetë, njerëz brenda partive dhe është normale, është edhe njerëzore sepse fundja fundit qenia njerëzore është krijuar dhe deri sa të zhduket me intriga do merret. Rama pastaj merr çmimin Nobel. Është i paparë për të krijuar insinuata të tilla. Unë nuk kam ndonjë kompleks, pavarësisht se Ilir Meta nuk ka qenë dakord për të qenë unë Kryetare e LSI. Se po të kishte qenë do ta kishte bërë kur u largua vet por ishte z.Vasili që kërkoi zgjedhjen time për kryetare. Duke pasur parasysh që pozicionimi i LSI në parlament kërkonte një qëndrim stoik dhe për hir të se vërtetës ne mendojmë si një punë sepse shikojnë vetëm ditën e enjte njerëzit në TV por e gjithë java kërkon një intensitet të jashtëzakonshëm angazhim në parlament. Qoftë për komisionet, qoftë për përgatitjen e projektligjeve, qoftë për opozitën që do të bësh. Dhe nëse do të bësh një opozitë të mirëfilltë jo thjesht që kur flitet për shëndetësinë ti flet për rrugët. Por duhet të bësh një opozitë me alternativë dhe që prodhon politikë, kërkon angazhim jashtëzakonisht shumë të madh. Ashtu sikurse dhe LSI me largimin e Ilir Metës do të kërkonte një lloj profili tjetër. Nga një njëri i cili rrezatonte, siguri, garanci dhe pushtet për njerëzit. Tashmë që LSI do të dilte në opozitë do të kërkojë një fizionomi tjetër. Figura ime në politikë historikisht që kur kemi qenë bashkë në PS ka qenë një figurë që punon në terren, merret me organizimin, mban lidhje të drejtpërdrejta me njerëzit dhe nuk është se unë si Monikë jam shquar për të bërë politika dhe marrëveshje të mëdha. Ndryshimi im dhe i Metës qëndron në këtë gjë dhe normalisht sot LSI nuk ka nevojë për të bërë marrëveshje të mëdha politike as me Edi Ramës as me Lulzim Bashën sesa ka më shumë nevojë për të riformatuar bastionet e saj, skuadrilet e veta në aspektin e organizmit. Organizatat e saj, faktorët kyç për ti ripozicionuar dhe që kanë të bëjnë drejtpërsëdrejti jo vetëm më interesat e njerëzve të LSI por me zgjidhjen e problemeve në zonën ku ata jetojnë dhe për tu qenë njerëzve pranë. Sigurisht që sot klasa politike nuk ta ofron këtë gjë sepse njerëzve u ka ardhur në majë të hundës me ta.
Znj.Kryemadhi ta kam thënë edhe kur kemi biseduar privatisht dhe me humor të kam përmendur termin Opozita e Dibrës. Lulzim Basha është një djalë elegant një dibran. Monika Kryemadhi është një zonjë nga Dibra shumë e zonja për të qenë e për të fituar protagonizmin por gjithsesi është një zonjë që e bën elegante në sjelljen politike po flas pavarësisht ndoshta dhe emocionet e çastit. A mund të mundet Edi Rama ky rrezik kombëtar i komanduar sipas jush tërësisht nga krimi me elegancën e opozitës së Dibrës.
E ke parë besoj filmin, Armiku te porta. Edhe Vasil Zajcev kishte 5 fishek edhe pushkën e shokut kur hyri në betejë për hir të së vërtetës. Dhe beteja për Staligradin po ta shikosh është e njëjta histori siç është sot beteja që ka opozita me Edi Ramës. Pra në numër dhe në armatime ata janë shumë më të mëdhenj por këtu qëndron forca dhe besimi që ti do të luftosh. Dhe unë e shikoj veten time si një Vasil Izajtcev në këtë histori. Por siç e shikoj unë e shikojnë dhe shumë të tjerë në LSI dhe mendoj që është bindja. Nëse unë nuk jam e bindur do të jetë e pamundur ama nëse unë besoj tek beteja ime, kauza ime unë do të luftoj deri në fund.
Meqenëse jemi te besimi, është shumë e rëndësishme kjo që thatë që t’ju besoj populli i opozitës në radhë të parë ju duhet ti besoni njëri tjetrit. A i besoni ju Lulzim Bashës? Kur e keni takuar Lulzim Bashën e keni pyetur se çfarë është folur në marrëveshjen e 17-Majit?
As e kam pyetur dhe as më intereson.
Po Lulzim Basha a ju beson juve? Jeni e vetmja parti në Shqipëri që keni qenë edhe me të majtën edhe më të djathtën.
Unë flas për veten time jo për z.Basha. Di të them që loja jonë politike nuk është më një lojë por është betejë politike. Pra në qoftë se deri dje ne kishim një lojë politike sepse kushtet në të cilat luhej politika pra ikte njëra palë, vinte pala tjetër ishte një lojë politike ose një mënyrë e të bërit politik në Shqipëri. Sot është betejë ekzistence për kombin shqiptar. Sepse kemi një njeri përballë që ka një plan biznesi për ta shkatërruar këtë vend. Këtej po krijon një hemorragji të trurit të shqiptarëve dhe të fuqisë punëtore në mënyrë permanente dhe çdo vit nga 200 mijë dhe vazhdojnë më shumë. Nga ana tjetër kërkon helmimin e tokave të bukës që e vetmja pasur që kemi ne aq pak tokë kërkon ta helmojë me plehra. Nga ana tjetër të vetmet pasuri natyrore që kemi, naftën, aeroportin, bregdetet, shkon dhe i jep me koncension. Atëherë çfarë është Shqipëria? Nuk është më asgjë. Nëse unë nuk do ta besoj Lul Bashën është faji im sepse kur ti shkon në luftë, gjatë gjithë kohës do të luftosh me idenë se shoku yt do te vrasi, nuk do të luftosh fare.
Kur Monika Kryemadhi dhe Petrit Vasili shkuan në zyrën e Lul Bashës për të bashkërenduar një farë kalendari politik, a keni në mendje akuzën e Ilir Metës.
E kam thënë dhe e them unë nuk pyes as Lul Bashën as Ilir Metën për orën. Unë kam orën time. Dhe sot ka ardhur ora për të rrëzuar Edi Ramën . Nëse ne do pyesim sa është ora njëri tjetrin Edi Rama ka mbaruar punë me Shqipërinë dhe nuk do të ekzistojë më. Sot ka ardhur ora të shpëtojmë Shqipërinë, kush do të bëhet pjesë e kësaj, kush nuk do le të bëhet zogu pushverdh i Edi Ramës që bën ciu ciu gjithë kohës. Nëse unë nuk do të kisha besim te z.Basha LSI do ta kishte shumë të vështirë për të bërë aksionin e saj. Dhe nëse do të mungonte besimi te z.Basha do ti bëja një nder shumë të madh Edi Ramës. Pra unë e besoj z.Basha për të luftuar Edi Ramën. Kjo është një nga armët e mia të forta kundër Edi Ramës që unë do ta besoj dhe e besoj z.Basha në luftën kundër Edi Ramës. Nëse çdo anëtar i LSI bashkëpunon me çdo anëtar të PD në terren i heqim çdo ditë një tullë më shumë Edi Ramës. Çdo bashkëpunim i atyre njerëzve që nuk besojnë te Edi Rama pavarësisht ndarjeve politike që kemi, zënkave, imazheve,luftës edhe shijeve, siç e thotë dhe z.Berisha, çdo grimcë opozitare duhet të mblidhet bashkë kundër Edi Ramës. Në momentin që unë do të kthej kokën mbrapa Edi Rama do të mbretëroj dhe do te vazhdojë më i fortë se ç’ka mbretëruar deri tani. Unë do të qëndroj në rrugën time ashtu si do të qëndroj dhe LSI. Ne kemi një qëndrim të qartë, integrimin europian të panegociueshëm, kemi partnerin tonë strategjik SHBA, po prapë e panegociueshme dhe mbi të gjitha është fuqizimi ekonomik i shqiptarëve.
Dy gjëra paskeni të panegociueshme, integrimin europian që kanë ambasadore në Tiranë Romana Vlahutin dhe aleat strategjik SHBA që kanë ambasador në Tiranë Donald LU. Ajo që bie në sy është replika në distancë direkt ose indirekt ndërmjet zyrtarëve më të lartë të LSI dhe dy ambasadorëve. Si ka mundësi që të paktën prej tre muajsh replikat ndërmjet ambasadorëve në Tiranë dhe zyrtarëve të LSI janë çdo ditë para syve të shqiptarëve kur ato dy gjëra janë të panegociueshme?
Unë nuk i lexoj si replika varet sesi i lexoni ju. Unë i lexoj si bashkëbisedim me ta sepse ashtu sikurse them që ata janë ambasadorë të shteteve të tyre nuk janë ambasadorë të qeverisë shqiptare. Në të kundërt do na duhej të kishim dhe ambasadorë për opozitën. Përsa i përket replikave tona, koha ka treguar që LSI për gjithë gjërat që ka bërë jo vetëm ka pasur koherencë dhe ka treguar që ka qenë luajale përsa i përket Reformës në Drejtësi sepse kam thënë që nuk do të flas për të por vetëm do të them diçka. Pa LSI Reforma në Drejtësi nuk do të ishte e mundur. LSI symbyllur votoi 7 ligjet sepse ia kërkuan çifti i ambasadorëve. Sigurisht që bëmë gabim. Pra, ku qëndron diskutimi në këtë drejtim? Kur ti je në një bashkëpunim gjithmonë projektligjet i kalon symbyllazi, sepse mendon që grupi i punës ka bërë një punë shumë të mirë. Por kjo tregoi që ligjet kanë qenë gjithmonë me idenë për tu kapur. Ashtu sikurse ligji e bën shumë të qartë që Prokurori i Përgjithshëm zgjidhet me 84 vota doli që Kuvendi e zgjodhi me 69 vota. Cënoi ligjin dhe Kushtetutën. Ashtu sikurse ne bëmë një luftë të paparë që ONM-a të vinte dhe të bënte listën e famshme të KLP dhe KLGJ dhe e bëri. Bëri një listë të zezë të personave që nuk kualifikoheshin dhe bëri një listë tjetër ku edhe pse nuk plotësoheshin kriteret u mbyll një sy dhe një vesh. Erdhën në parlament dhe Sekretari i Përgjithshëm i Parlamentit që është ish Sekretari i Përgjithshëm i ministrit Tahiri, që ka vulosur cdo vendim të Tahirit, e kthen listën e ONM-së përmbys. Listën e zezë e bën listë të bardhë dhe listën e bardhë e bën listë të zezë. Pra, paska pasur të drejtë LSI dhe opozita dhe nuk paskan pasur të drejtë ambasadorët. Jam e bindur që znj. Vlahutin nuk është juriste dhe nuk është marrë me çështjet konstitucionale apo me ligjet. Po të marrin CV-të e stafeve të tyre dhe t’i vendosim përballë ekspertëve tanë që kemi në Shqipëri, niveli është shumë i ndryshëm. Duhet të shpëtojmë nga kompleksi i të qenit inferior ndaj të tjerëve. Ne kemi juristë shumë të mirë, konstitucionalistë shumë të mirë. Nëse ne nuk do të bëjmë gjërat siç duhen bërë për shqiptarët, jo siç i intereson një ambasadori që ka interes karrierën e tij, ne do të vazhdojmë të jemi në tranzicion. E kemi nisur procesin e integrimit njëlloj me Kroacinë dhe sot jemi shumë larg tyre. Dua të them edhe një gjë tjetër reformën në drejtësi. LSI në të gjithë historikun e saj 13 vjecar nuk ka asnjë propozim as për prokuror, as për gjyqtar. Nuk ka absolutisht asnjë emër. Edhe tani na e ofroi në PS që të zgjidhnim 3 opozita dhe dy ata. Nuk dua fare unë të bëj. Ne duhet të insistojmë që ai që hyn në sistemin e drejtësisë të jetë njeri që zbaton ligjin, ka kredibilitet, ka integritet, i ka të gjitha. Do të ndodhë sikurse ndodhi në Rumani ku bënin thirrje: ‘Futini politikanët në burg’. Pas dy vjetëve del tani gjithë Rumania në burg dhe thotë: ‘Të shkojë prokurorja në burg’. Sepse edhe ata femër e kanë prokuroren. Morën një prokurore që e vendosën atje si kamxhik politik, që ishte në dorën e disa politikanëve për të bërë luftën e vet politike. Por, cili është problemi? Problemi është që ti hyn në një valle, hyn në lojën politike, por në momentin që ti digjesh si kartë, politika të lë. Le të marrin të vënë prokuror të përgjithshëm një politikan. Le ta bëjnë Edi Ramën prokuror të përgjithshëm. Sepse të paktën edhe kur ta luftojnë atëherë do të ketë dhjetë njerëz nga mbrapa. Po këtë zonjën e shkretë që ka hyrë në këtë lojë politike, kush do dalë ta mbrojë? E mbani mend Ina Ramën? Edhe ajo hyri në një lojë politike, ngeli rrugëve. Pse? Sepse nuk i dilte për zot asnjeri. Prandaj, duhet një sistem drejtësie, i cili jo vetëm të jetë i pavarur, jo vetëm të mos jetë pjesë e politikës, por edhe këta njerëz që do marrin vendime shumë të rëndësishme, t’ju dalë garant shteti. T’i dali garant edhe politika, edhe qytetarët.
Znj. Kryemadhi, tashmë jemi edhe dy ditë përpara protestës së paralajmëruar nga opozita. A keni një axhendë ju si opozitë se si do të menaxhohet kjo protestë? Çfarë do të ndodhë?
Është shumë e thjeshtë, sepse po kujtoni se do të zhvillohet lufta e tretë botërore. Do jetë një protestë ku qytetarët do të marrin pjesë. Ne jemi pas njerëzve. Populli është përpara.
Jeni ju para popullit apo populli para jush?
Ne i krijojmë infrastrukturën qytetarëve që të vijnë të protestojnë. Ne do të bëjmë çfarë do të thotë populli. Jam e bindur që nuk ka popull që do të dëmtojë imazhin e tij. Edi Ramës i intereson të ketë protestë agresive. Pse ju intereson? Për të thënë: Ja çfarë janë këto, etj, etj. Në gjithë filozofinë dhe historikun tonë, protestat kanë qenë paqësore. Protesta e 21 janarit ka qenë protesta që ka krijuar perceptimin dhe imazhin e dhunës. Megjithatë dua t’ju them diçka që do të jetë paqësore sepse njerëzit do të vijnë aty me familjet e tyre, me prindërit, me fëmijët. Sepse kë do të godasin? Godinën që nuk do ta ketë Edi Ramën brenda sepse do të jetë në Davos.
Kthehet të premten… E keni këtu të shtunën…
Po shumë mirë, por se mos rri atje në Surrel, e lë fare Kryeministrinë.
Ja protesta më 27. Çfarë do të ndodhë më 28 janar znj. Kryemadhi?
Ka shumë probleme që kanë hapat e tyre, duke filluar me çështjen e inceneratorëve, me çështjen e arsimit të lartë, që janë gllabëruese dhe të tmerrshme, duke vazhduar me shëndetësinë, me infrastrukturën. Me vjedhjen që po i ndodh çdo ditë shqiptarëve. Kështu që mos u bë merak z. Peka. Axhenda pas datës 27 do të jetë aq e mbushur saqë vetëm do kërkojë gazetarë nga ju që t’i ndiqni në çdo moment.
Gazetarë ka dhe pavarësisht kapjes së mediave kryesore sot në vend, ka mundësi për t’u pasqyruar në mënyrë objektive, por ndoshta kjo mund të jetë opozita e vetme në Evropë që pas kaq shumë skandaleve, populli i lutet që të organizojnë një protestë. Dhe në këtë pjesë nuk e di se sa përgjegjësi apo meritë keni por gjërat kanë ndodhur që në tetor-nëntor dhe protesta organizohet në fund të janarit. Apo ishte menduar i gjithë një stil protestash?
Jo, duhet të kemi parasysh dy gjëra. Ju ndoshta keni shumë të drejtë për momentin kur doli çështja e z. Tahirit, por protesta nuk kishte të bënte me të. Z. Tahiri është një ndër ushtarët e bindur të perandorisë së madhe të z. Rama. Mos të harrojmë që kishim një opozitë që vinte e ndarë nga zgjedhjet e 25 qershorit, ku kishim PD që vinte me rënie mandatesh, por kishim edhe LSI-në që edhe pse vinte me ngritje në rezultat në numër mandatesh, largohet nga pushteti me dëshirën e saj. Pra, 226 mijë vota të LSI-së kanë qenë 226 mije njerëz që kanë besuar tek qëndrimet e forta që mbajti LSI gjatë fushatës së saj. Për mua ata janë heronj sepse kanë përballuar presione të jashtëzakonshme të krimit të organizuar, të cilët ruheshin nga strukturat e policisë. Pastaj se çfarë ndodh me çështjen ‘Tahiri’ është që na ndërgjegjësoi edhe ne për faktin që ajo çështje u shtrua në tryezë, dhe kjo jo për shkak të prokurorisë apo policisë shqiptare, por nga shërbimet e huaja. Kjo tregon që Shqipëria tashmë nga një vend stabiliteti ishte kthyer në një konsumatore sigurie, pra në një vend që eksportonte destabilitet. Kjo është një kambanë alarmi shumë e madhe për ne për ta kuptuar. Mos të harrojmë që sot është shumë e vështirë për të bërë protesta, sepse sot duhet jo vetëm të organizosh njerëzit, por edhe të duhet ta menaxhosh atë sepse mund të dalë jashtë kontrollit dhe e mban ti përgjegjësinë. Ajo çka unë mendoj është që më mirë vonë se sa kurrë sepse edhe mund të mos bëhej protestë fare dhe ta kalonim, ashtu sikurse sot me prokurorin e përgjithshëm kemi një rikthim të krimit të organizuar që kontrollon sistemin e drejtësisë. Pra, ja çfarë ka ndodhur. Janë hedhur grepat për tu kapur peshqit e mëdhenj, rrjeta është çarë edhe ato po na ikin. Kështu që ajo çka dua të them është që siguria e jetës së qytetarëve është e cenuar jashtëzakonisht shumë, ku nuk janë farë të sigurt. Ne e dimë që çdo ditë ka ngjarje të dhimbshme, pra ka vrasje pafundësisht. Nga ana tjetër kemi largimin e njerëzve në mënyrë permanente, të vazhdueshme dhe të shumëfishtë, e cila po sjell një lloj destabiliteti edhe mendor të shoqërisë shqiptare.
Para pak ditësh ish kryetarja e Kuvendit, znj. Topalli është shprehur se vendi nuk ka qeveri, por fatkeqësisht as opozitë. Madje ka ironizuar edhe pak afrimin tuaj me z. Basha sipas asaj të kapur nga Rama. Në të njëjtën linjë ka qenë dhe Astrit Patozi pak më vonë. A keni një koment për qëndrimet e Topallit dhe Patozit?
Ai është mendimi i tyre. Unë nuk mund të hyjë se ajo është çështje e brendshme e PD, por unë do t’i ftoja që të ishin në protestë në datën 27 janar për të treguar që ata vërtetë nuk e duan Edi Ramën dhe duan ta rrëzojnë Edi Ramën. Pastaj se kush është Lulzim Basha, ajo është punë e tyre dhe le ta zgjidhin. Unë jam vetë një person që ka luftuar brenda PS me Fatos Nanon dhe me grupimet ish-komuniste që kanë qenë brenda PS, më pas dhe kemi krijuar një parti, kemi qenë 8 burra dhe një grua. Por ama ishte një betejë disa vjeçare që në ‘96 që në kohën e mocionit të famshëm të Nanos deri në 2004. Betejë 12 vjeçare brenda PS për të luftuar, për t’i ngritur vlerat dhe faktikisht angazhimi i FRESH në atë kohë sepse ishte luftë brezash, ndërsa këtu unë nuk mendoj se është luftë brezash, këtu mendoj se është luftë grupesh. Sepse ne ishim të rinjtë e FRESH që vinim në PS që ishte ish-Partia e Punës. Në kohën që drejtonin figurat e prodhuara nga FRESH i asaj kohe, Shqipëria pati një zhvillim të jashtëzakonshëm që vinte menjëherë pas ’97. Unë do dëshiroja t’i ftoja të gjithë zërat kundër z. Basha që në datën 27 të jenë në shesh për të treguar vërtetë që nuk janë të kapur nga Edi Rama.
Jo pak zëra mediatik dhe analitik, qarkullon ideja se për Edi Ramën ka një stop. Emri i Fatmir Xhafaj qarkullohet çdo ditë e më shumë se mund të jetë një kryeministër socialist. A do ta votonte LSI Fatmir Xhafajn për Kryeministër?
Unë di të them këtë gjë që Edi Rama është një rrezik kombëtar. Që Edi Rama duhet t’i hapë rrugën Shqipërisë për të filluar negociatat me BE, duke u larguar. Që Edi Rama ka shkatërruar marrëdhëniet e Shqipërisë me SHBA me votimin që ka bërë në OKB duke vënë në pikëpyetje shumë gjëra të tjera që nuk i shohim ne në jetën e përditshme, por do t’i shohim më vonë kur të vijmë në problemet e sigurisë dhe në problemet që do të ketë nevojë Shqipëria për rolin dhe përkrahjen e SHBA në tryezë. Sepse janë gjëra që kanë të bëjnë me sigurinë dhe shumë e shumë gjera të tjera në të ardhmen. Pra, nuk është thjesht buka e përditshme e njerëzve. Se kush do jetë Kryeministër nuk më intereson fare. Kushdo kryeministër që të vijë i propozuar nga mazhoranca, e cila është një mazhorancë me mandate të kapura nga krimi i organizuar, LSI nuk e njeh. LSI do të njohë çdo lloj mandati kryeministri në momentin që vjen me mandate të pastra, që vjen nga zgjedhje të lira, të pa blera dhe nga zgjedhje të cilat bëhen si në çdo vend tjetër evropian.