Gjykata e Tiranës ka caktuar masën e sigurisë “arrest me burg” për 37-vjeçarin Roland Ahmetsulaj, i arrestuar për atentatin e regjistruar në zonën e “Don Bosko-s” në Janar të vitit 2022, ku mbeti i vrarë Erion Çela dhe u plagosën 4 të tjerë.
Në dëshminë e dhënë para togave të zeza, Ahmetsulaj ka mohuar përfshirjen në ngjarje, teksa pretendon se me Kevin Suçin, i cili dyshohet se ka qenë ekzekutori, ka komunikuar vetëm për rregullimin e një makine.
“Nuk kam lidhje me ngjarjen. Dy ditë para vrasjes kam patur bisedën me Kevin Suçin për rregullim makine. Më ka marrë për makinën nëse është rregulluar ose jo”, tha para gjykatës i riu.
Policia tha se ka patur shumë komunikime në orarin kur ka ndodhur ngjarja, por sipas avokatit të Ahmetsulaj biznesi i këtij të fundit ndodhet vetëm 700 m nga vendi i ngjarjes dhe se ka patur komunikime vetëm për punë. Edhe bashkëpunëtorët e drejtësisë Indrit Gentjan Beqiraj, nuk e kanë përmendur emrin e klientit të tij sipas avokatit.
Roland Ahmetsulaj prej vitësh merret me servis makinash ku ambjenti i tij i punës ndodhet vetëm rreth 1 km larg vendit ku u regjistrua ngjarja e rëndë. Hetuesit kanë dyshime se duke përfituar nga kjo distancë e shkurter 37-vjecari dyshohet të këtë dhënë infomarcione drejt personit të shpallur në kërkim Kevin (Zeneli) Suçi.
Po ashtu, Policia po verifikon nëse Roland Ahmetsulaj ka dijeni për vendodhjen e makinës tip Benz që lëviznin autoret diten e ngjarjes. Deri më tani nga verfikimet ende nuk është arritur në zbulimin e kësaj makine.
Porositësi i këtij atentati akuzohet se ka qenë Kasandër Noga, për shkak të hasmërisë së vjetër. Ngjarja është zbardhur pas zbërthimit të telefonit të tij, pas arrestimit në Belgjikë. Në rolin e ekzekutorit ka qenë Kevin Suçi, bashkë me dy persona të tjerë të paidentifikuar nga Fushë Kruja.
Krahas këtyre personave, Zeneli ka kontaktuar për kryerjen e ngjarjes dhe Ilirian Feçin dhe vëllezërit Indrit dhe Gentjan Beqiraj. Këta të fundit ishin personat që zbërthyen fillimisht ngjarjen përpara hetuesve të Policisë së Durrësit, të cilët i vunë ata në pranga në Tetor të 2022.
Sipas hetimeve shtetasi Kasandër Noga në bashkëpunim me shtetasin Kevin Zeneli (Suçi), kanë zhvilluar takime dhe biseda, kanë siguruar dhe kanë dhënë shuma monetare, me qëllim vrasjen e shtetasit Geron Hasanbelliu por është ngatërruar shënjestër duke ekzekutuar gabimisht Erion Çelën e plagosur 4 të tjerë
