Pas vendimit të Rusisë për të dëbuar ambasadorin e Estonisë nga vendi, Talini i është përgjigjur duke bërë të njëjtën gjë.
Estonia lajmëroi dëbimin e ambasadorit Rus në Talini, duke argumentuar se marrëdhëniet diplomatike mes dy vendeve janë shkatërruar.
“Molla e sherrit” ka qenë mbështetja e Estonisë ndaj Ukrainës dhe zhvillimi i takimit mes 11 vendeve anëtare të NATO-s në Talin, për të diskutuar agresionin rus.
Vendimi i Estonisë është përshëndetur dhe nga Lituania, e cila në një shfaqje solidariteti me fqinjin e saj baltik, njoftoi se do të ulë marrëdhëniet diplomatike me Moskën që nga 24 shkurti, datë që shënon dhe 1 vjetorin e luftës së Rusisë në Ukrainë.
Ministria e Jashtme ruse thirri ambasadorin e Estonisë Margus Laidre dhe e urdhëroi atë të largohej nga vendi deri më 7 shkurt, hera e parë që dëbon një ambasador të një vendi të BE-së që nga fillimi i pushtimit të Ukrainës.
Si kundër përgjigje, ministri i jashtëm estonez Urmas Reinsalu tha se ambasadori rus do të largohet, në përputhje me “parimin e barazisë”.
#Estonia takes note of today’s decision by Russia to reduce diplomatic presence to the level of chargé d’affaires.
We stand by the principle of parity in relations with Russia, which means that the Russian Amb. will leave at the same time as the Estonian Amb. to Russia.
— Estonian MFA 🇪🇪 | 🌻 #StandWithUkraine (@MFAestonia) January 23, 2023
Estonia ka treguar mbështetjen e saj ndaj Ukrainës, që në fillimin e luftës vitin e shkuar, ku në tetor e ka shpallur Rusinë si një “regjim terrorist”.
Kujtojmë që Estonia ka qenë pjesë e Bashkimit Sovjetik, por prej vitesh ka pasur marrëdhënie të vështira me Rusinë.
