Mësuesja dhe drejtoresha e shkollës 9-vjeçare Ali Dem, Dorina Kuka, pas betejës me tumorin në gjoks, tashmë është ekzaminuar me masë tumorale në kokë.
Kuka është nisur drejt Italisë për një mjekim më të specializuar i cili do të kushtojë 140.000 euro. Për mësuesen është hapur dhe një llogari në “Gofundme”, në të cilën mund të kontrubuoni me aq sa mundeni për të mbledhur shumën për të cilën, 35 vjeçarja, nëna e dy fëmijëve ka nevojë për tu kuruar.
Ditën e sotme në një postim në rrjetet sociale, Kuka, ka falenderuar të gjithë ata persona të cilët e kanë ndihmuar në mënyra të ndryshme në këto ditë të vështira për të, teksa ka theksuar se forca e saj për të mposhtur këtë sëmundje janë dy fëmijët e saj.
“Të dashura mikesha!
Të dashur miq, kelege e kolegë!
Nëpërmejt këtij statusi dëshiroj t’ju shpreh falenderimet më të ngrohta e sinqerta për gjithçka më dhatë duke më mbështetur në forma të ndryshme për të përballuar sfidën më të vështirë që jeta më vuri përpara.
Fjalët, mesazhet e vazhdueshme, inkurajimi, ndihma financiare, shpresa që më përcollët u bënë fuqia ime.
Falenderime nga zemra, nga unë e familja ime, për gjithkënd dha ndihmë financiare!
Faleminderit nga zemra për miqtë e mikeshat e veçanta që m’u gjendën pranë në çdo moment!
Fjalët janë të pakta krahasuar me atë çka ju të gjithë bëtë e vazhdoni të bëni për mua.
Deri më tani kam mbaruar radioterapine për të vijuar së shpejti me terapinë e radhës, një fazë e vështirë e sëmundjes.
Me dashurinë e familjes, mikeshave e miqve, do të gjej forcën e duhur për të luftuar për jetën e për të fituar betejën më të vështirë për dritën e syve dy fëmijët e mi që janë motivi i çdo dite që lind!
Dëshira për të jetuar ështa e pacak, ndaj dhe beteja vazhdon!
Shumë falenderuese e mirënjohëse!
Me respekt e dashuri
Dorina Kuka
Klodeta Dibra #ShpresaDelija #ArjolaByzyka”, shkruan Kuka.
