Gjithnjë e më shumë qytetarë grekë po marrin telefonata nga jashtë vendit, ku ftohen të investojnë në programe financiare të supozuara fitimprurëse.
Mediat greke shkruajnë se nëpërmjet këtyre telefonatave synohet nxjerrja e informacioneve personale dhe qasja në llogaritë bankare. Ata që bien në këtë kurth përballen me faktin që llogaria e tyre bankare zbrazet.
“Nëse merrni një telefonatë nga jashtë, konkretisht nga Londra, duhet të dini se personi që ju ka telefonuar nuk është padyshim miku juaj, por dëshiron të vjedhë para nga llogaria juaj. Muajt e fundit, telefonatat me prefiksin 0040 janë bërë gjithnjë e më të zakonshme si në telefonat celularë ashtu edhe në ato fikse”, shkruajnë mediat fqinje.
Për këto telefonata janë zgjedhur persona që dinë të flasin mirë greqisht dhe përpiqen që të joshin viktimat e mundshme të investojnë në kompani që garantojnë shumë fitime, vetëm se këto janë kompani fantazmë që synojnë të nxjerrin informacione të llogarisë bankare.
Baza e mashtrimit është vlerësuar të jetë në Shqipëri, si dhe në Ukrainë.
