E ka pësuar organizatori i garave sportive me makina në aksin rrugor Lezhë-Mamurras, tek “Mbikalimi i Patokut”.
Në lidhje me një video të publikuar në rrjetet sociale, ku shfaqeshin drejtues mjetesh që kishin ndaluar mjetet e tyre, me qëllim për të realizuar gara sportive, në aksin rrugor tek “Mbikalimi i Patokut”, duke penguar lëvizjen e lirë të mjeteve të tjera, duke prishur rendin e qetësinë publike dhe duke organizuar grumbullime të njerëzve, shërbimet e Policisë Rrugore Lezhë, falë veprime të shpejta hetimore kanë bërë të mundur identifikimin e njërit prej drejtuesve të mjeteve.
Në vijim të veprimeve hetimore, filloi procedimi penal për shtetasin E. K., 35 vjeç, banues në Tiranë, për veprat penale “Pengimi i qarkullimit të mjeteve të transportit”, “Prishja e rendit dhe qetësisë publike”, “Organizimi dhe pjesëmarrja në grumbullime” dhe ” “Kundërshtimi i punonjësit të Policisë”. 35 vjeçari është njëri prej shoferëve në këtë garë i cili ka organizuar dhe garën.
Ndaj tij policia ka vendosur masë administrative 150.000 lekë.
Orgazniatorët dhe pjesëmarrësit në garë penguan qarkullimin e mjeteve të transportit rrugor, për të realizuar gara sportive, prishën rendin dhe qetësinë publike, organizuan grumbullime dhe më pas postuan video në rrjete sociale. Gjithashtu, shërbimet e Policisë kanë gjetur dhe makinën “superbishë” në pronësi të 35 vjeçarit i cili e kishte dërguar atë në një servis, për ta çmontuar.
