Andrea Mano, i cili dha dorëheqjen nga drejtimi i PD-së së Korçës, por edhe si anëtar i Këshillit Kombëtar të kësaj force politike, ka akuzuar Lulzim Bashën, se po minon demokracinë brenda Partisë.
Andrea Mano, në një intervistë për Report tv, tha se “PD është kthyer në një parti ku kryetari vendos për gjithçka, dhe kur vjen rezultati i zgjedhjeve, i vetmi që nuk ka përgjegjësi është kryetari”.
I pyetur nëse PD do të mund të rrëzojë një ditë Ramën dhe të vijë në pushtet, Mano tha se Ramën e rrëzon vetëm populli dhe jo PD.
“Ramën mund ta rrëzojë vetëm populli, jo PD. Detyra e Partisë Demokratike është të shohë pikë së pari veten e vet, organizimin dhe mënyrën e përfaqësimit.
Duhet që të gjenden individë që përfaqësojnë më gjërë sesa një parti, përfaqësues të Shoqërisë Civile, grupe interesi.
Duhet të lindësh shpresën te njerëzit, të jesh më i besueshëm.
Gjithë këto pakënaqësi që për tetë vite qytetartë kanë ndaj Ramës, pse njerëzit shkojnë e votojnë sërish për të tretën herë?
Nuk mundet që gjithë këta njerëz të gabojnë, unë mendoj se nuk e gjejnë veten te opozita dhe le të themi që “zgjedhin të keqen më të vogël”.
PD duhet të përfaqësojë të gjitha shtresat e shoqërisë e kjo nuk bëhet duke betonizuar partinë, por duke pasur liri, përfaqësim për secilin dhe jo vendimmarje autokrate.”-u shpreh Andrea Mano.
Sa i takon deklaratave të Bashës, i cili thotë se nuk i njeh zgjedhjet e 25 prillit, Mano tha se qëndimi është mjaft kontradikor, përderisa ai do futet në Kuvend, në shtator.
“Qëndrimi për zgjedhjet është kontradiktor. Thotë nuk e njoh këtë Kuvend e shkon në Kuvend.
Nuk mund të themi nuk i njohim zgjedhjet e të shkojmë në një Kuvend, të zgjedhur nga këto zgjedhje.
Ose duhet të njohë zgjedhjet e të evidentojë problematikat, ose duhet vendosur çdo bëhet me Kuvendin”-tha Andrea Mano.
Gjithashtu ai u ndal edhe tek zgjedhjet brenda PD-së, për të cilat tha se “Ato nuk ishin zgjedhje. Unë e dija rezultatin që para se të mbaheshin zgjedhjet. Nuk mund të jesh kryetar e të garosh për kryetar”.
