Një protestë sloganin “Falja e detit” u zhvillua paraditen e sotme në sheshin Skënderbej nga një grup aktivistësh të shoqërisë civile.
Disa prej të pranishmëve kërkuan njëzëri, më shumë transparencë. Aktivisti Aulon Kalaja, tha se duhet të zbardhet përmbajtja e bisedës telefonike Dendias-Rama.
“Të zbardhet biseda telefonike mes ministrit të jashtëm Dendias me kryeministrit Rama. Pse do të vizitojë shqipërinë dhe a do të ketë lidhje me zgjerimin e kufirit grek.
Shqipëria duhet të jetë reciproke në marrëveshjen me Greqinë. Jemi për marrëveshje të ndershme dhe Shqipëria të ulë në tryezë ekspertët më të mirë, jo spiunët.
Ne nuk do të djegim flamurin grek, por do të ngremë sa më lart flamurin shqiptar”, u shpreh Kalaja.
Ndërkohë që një nga aktivistët akuzoi Ramën se ka shitur vendin. “Çohuni të mbrojmë vendin me armë. Po na shet kryeministri. Nuk është kryeministri i Shqipërisë, nuk është kryeministri i këtij vendi.”
I pranishëm në protestë ishte edhe aktivisti Sazan Guri. Ai tha se ka vite që flitet kjo marrëveshje, ndërsa shtoi se Greqia do të pushtojë zonën ekskluzive ekonomike.
“Këtë marrëveshje prej 10 vitesh me palën shqiptare, nga 6 milje, sot deklaron 12 milje. Kjo do të thotë pushtim të zonës ekskluzive ekonomike. Kjo do të thotë që shteti shqiptar nuk do të ketë pjesë detare në shtetin e vet”, tha Guri.
