Një automjet ka marrë flakë në ecje në Berat, por fatmirësisht drejtuesi i mjetit nuk ka pësuar lëndime. Flakët e zjarrit shkaktuan djegien e çdo pjese motorike e xhenerike brenda kofanos. Zjarrfikësit kanë thënë se zjarri është shkaktuar nga një shkëndijë elektrike në motor.
Një automjet është përfshirë nga flakët mbrëmjen e sotme në Berat. Automjeti ka qenë duke qarkulluar në lagjen “Gjashtëkatësh”, kur është përfshirë nga flakët e zjarrit. Flakët kanë filluar në pjesën e përparme të kofanos së makinës dhe në një kohë shumë të shkurtër kanë djegur të gjithë pjesën e përparme të mjetit, tip Benz, A Class, me targa AA 668 ER.
Fatmirësisht drejtuesi i mjetit, sapo ka parë flakët e zjarrit që po dilnin nga pjesa e brendshme e kofanos, ka dalë me shpejtësi nga mjeti pa lëndime. Në vendngjarje kanë shkuar forcat e Shërbimit të Zjarrfikëseve të qytetit dhe forca të shumta policie, që kanë bërë të mundur shuarjen e flakëve të zjarrit brenda automjetit, tashmë të parkuar. Edhe pse flakët e zjarrit u fikën shumë shpejt nga zjarrfikësit, dëmi që pësoi mjeti tip Benz ishte shumë i madh pasi flakët përfshinë 80% të mjetit.
Ekspertët e Shërbimit Zjarrfikës, pas ekzaminimit të mjetit, kanë dalë në konkluzionin se shkak për rënien e zjarrit është bërë një shkëndijë elektrike në motor.
