Konsumimi i kanabisit nga nënat gjatë shtatzënisë shton shumë rrezikun e autizmit tek fëmija. Në këtë konkluzion arrin një studim i mjekëve të Spitalit të Fëmijëve në Ontarion Lindore në Kanada, i publikuar së fundi në revistën Nature Medicine.
Sipas tyre, rreziku i lindjes së një fëmije autik tek nënat që konsumojnë kanabis gjatë shtatzënisë rritet minimalisht me 50%. Studimi konstaton se substancat e rrezikshme që ka në përbërje kanabisi, si tetrahydrokanabinoli kanë vetinë të përcillen direkt në fetus nga nëna, përmes rrjedhës së gjakut. Në këtë mënyrë ato shkaktojnë çrregullime të parikuperueshme që në zhvillimin e trurit dhe sistemit nervor tek fëmijët.
Studimi bazohet tek rezultatet e mbikëqyrjes për 5 vite radhazi të gjysmë milioni grave nga viti 2007 deri në 2012-ën, 0.6% e të cilave përdorën kanabis gjatë shtatzënisë. Bëhet fjalë për studimin më të madh të zhvilluar deri më tani për pasojat që shkakton konsumimi i kanabisit gjatë shtatzënisë.
Publikimi i tij vjen si paralajmërim teksa në shumë vende të botës, përfshirë Kanadanë, Shtetet e Bashkuara, etj, konsumimi i kanabisit po liberalizohet. Studime të mëherëshme konstatonin se konsumi i kanabisit gjatë shtatzënisë është shkak për lindje të parakohshme apo peshë më të ulët se normalja të të porsalindurit.
