Interpoli deklaroi të martën se aksioni i tij më i madh i armëve të zjarrit në Amerikën Qendrore dhe Jugore rezultoi në sekuestrimin e mijëra armëve të paligjshme dhe drogave me vlerë 5.7 miliardë dollarë, pas bashkëpunimit të paprecedentë nga 15 vende.
Organizata ndërkombëtare e policisë shtoi se autoritetet e Amerikës Qendrore dhe Jugore kishin bërë 14,260 arrestime gjatë “Operacionit Trigger IX”, i kryer midis 12 marsit dhe 2 prillit.
“Fakti që një operacion që kishte në shënjestër armët e paligjshme të zjarrit rezultoi në konfiskimt kaq masive të drogës është një provë tjetër, nëse është e nevojshme, se këto krime janë të ndërthurura”, tha në një deklaratë Sekretari i Përgjithshëm i Interpolit, Juergen Stock.
Operacioni gjeti 8,263 armë zjarri ilegale dhe afro 306,000 fishekë, si dhe 203 ton drogë dhe 372 ton prekursorë droge. Njëmbëdhjetë persona u shpëtuan në Paraguaj kur autoritetet shpërbënë një rrjet të trafikut njerëzor, tha Interpol.
Ai tha se zbatimi i ligjit kishte raportuar një rritje të dhunës lidhur me drogën gjatë vitit të kaluar, e nxitur nga trafikimi i armëve të paligjshme të zjarrit. Operacioni i saj zbuloi gjithashtu korrupsion, mashtrim, krim mjedisor dhe aktivitete terroriste.
Në operacion morën pjesë autoritetet nga Argjentina, Bolivia, Brazili, Kili, Kolumbia, Kosta Rika, Ekuadori, El Salvadori, Guatemala, Hondurasi, Meksika, Panamaja, Paraguai, Peruja dhe Uruguai.
Më shumë se gjysma e “armëve të krimit” të gjetura dhe të gjurmuara në Amerikën Qendrore janë me burim nga Shtetet e Bashkuara, sipas agjencisë amerikane të kontrollit të armëve ATF. Ky nivel është afër 70% për Meksikën dhe është rreth 80% në të gjithë Karaibe.
Në total, autoritetet kanë ndërprerë veprimtarinë e 20 grupeve kriminale, përfshirë shoqatën braziliane të krimit, Primeiro Comando da Capital, bandën e të rinjve të Salvadorit, Mara Salvatrucha dhe Kartelin e Ballkanit, që është aktiv edhe në Amerikën Jugore.
“Rrjetet e krimit të organizimit, me të gjitha aktivitetet e paligjshme, e kanë vetëm një prioritet, profitin. Ne, si zyrtarë për zbatim të ligjit, duhet të tregojmë vendosmëri për t’i shkatërruar këto grupe në çdo rajon të botës”, ka thënë mes tjerash Stock.
