Këshilli Politik është mbledhur për të diskutuar çështjet e mbetura pezull të reformës zgjedhore . Ato janë disa dhe nuk është e qartë , nëse do të ketë kohë për të arritur sonte një dakordësi .
Megjithë volumin dhe vështirësinë e negociatave , gjëja pozitive është se në tryezë sonte nuk ka çështje të reja . Opozita i ka dorëzuar që mbrëmë propozimet për garancitë e votës në zgjedhje , duke e çuar deri në fund pjesën e angazhimit të saj me reformën zgjedhore .
Pjesë e këtyre propozimeve janë edhe qeveria kujdestare për zgjedhjet dhe roli i gjykatës kushtetuese . Diskutimi i tyre ende nuk ka nisur , por është e rëndësishme që të gjitha çështjet janë mbi tavolinën e bisedimeve .
Aktualisht Damian Gjiknuri dhe Oerd Bylykbashi janë ndarë nga grupi i ekspertëve dhe po zhvillojnë një takim veçmas me një përfaqësues të ambasadës Amerikane ndërsa të tjerët po presin të kthehen për të vijuar diskutimet . Në këtë takim nuk ndodhet as Rudina Hajdari dhe as Petrit Vasili .
