Partia e Aleksandër Vuçiç ka arritur të fitojë thellë zgjedhjet ne Serbi.
Kjo, edhe prej faktit se opozita reale, vendosi të bojkotojë zgjedhjet.
Një skenar ky, i ngjashëm me atë që ndodhi në Tiranë vitin e kaluar.
Është pikërisht kjo arsyeja, që në mediat pranë PD-LSI, sot ka pasur analiza e shkrime kundër fitores së Vuçiç, me argumentin se ato ishin zgjedhje autokrate e monopartiake.
Fitoren e tij, e shohin edhe si një humbje të tyren, pasi ndoqën të njëjtën rrugë si opozita serbe, përballë Ramës.
Lideri i opozitës së bashkuar, Dragan Gjilas, tha se kanë votuar vetëm 42% e serbëve me të drejtë vote, ndaj deklaroi se bojkoti ka dhënë rezultat dhe qeveria e re nuk do të ketë legjitimitet.
Njësoj siç deklaronte Basha, se Rama u refuzua nga 85% e shqiptarëve.
Megjithatë ndërkombëtarët i kanë njohur rezultatet. Komisioneri Europian për Zgjerimin, Olivér Várhelyi, deklaroi se “21 qershori ishte një ditë e rëndësishme për Serbinë. Ne jemi të angazhuar për të ndihmuar vendin për të ecur përpara drejt Bashkimit Europian”.
Por Vuçiç në Tiranë e shohin edhe si aleat të Ramës, dhe kjo është një tjetër arsye për PD-LSI, ta shohin fitoren e tij, si një humbje të tyren.
Në fakt, ajo që duhet thënë, është fakti se këto zgjedhje duhen parë si një fitore për shqiptarët e Serbisë.
Për herë të parë në histori, ata do të kenë 3-4 deputetë në Kuvendin e Seribsë.
Dhe kjo, falë bashkimit të tyre, për të cilin ndikoi edhe Tirana zyrtare, me ministrin Genc Cakaj dhe kryeministrin Rama.
