Kancelarja gjermane Angela Merkel dhe Presidenti francez Emmanuel Macron gjatë takimit të sotëm nuk ranë dakord se kush duhet të jetë shefi i ardhshëm i Komisionit Europian.
Ndërkohë krerët e BE-së po negociojnë rreth emrave në postet më të larta të BE për pesë vitet e ardhshme.
Diplomatët europianë treguan se kancelarja Merkel ishte zhgënjyer nga mënyra se si Presidenti Macron kishte hedhur poshtë me shpejtësi kandidaturën e preferuar të Berlinit, ligjvënësin gjerman të qendrës së djathtë, Manfred Ëeber.
Zgjedhjet e javës së kaluar për Parlamentin Europian sollën një parlament ku fituan liberalët pro BE-së dhe të Gjelbërit nga njëra anë, si dhe nacionalistët euroskeptikë të së djathtës ekstreme në anën tjetër, duke e bërë më të vështirë arritjen e një axhende të përbashkët.
Zgjedhjet e Bashkimit Evropian që mbahen një herë në pesë vjet, kërkojnë zëvendësimin e krerëve të institucioneve kryesore të BE-së.
Merkel deklaroi se dëshironte që ligjvënësi Ëeber të ishte kreu i ardhshëm i Komisionit Europian, pas Jean-Claude Juncker i cili largohet më 31 tetor.
Presidenti francez Macron mesa duket nuk ka qenë dakord, duke renditur komisioneren e BE për çështjet e konkurrencës, danezen Margrethe Vestage, negociatorin e BE për çështjen e Brexit, francezin Michel Barnier, si dhe socialdemokratin hollandez Frans Timmermans si kandidatë më të përshtatshëm.
