Procesi i ankimimeve të zgjedhjeve të 11 majit nga Partia Demokratike, e cila pretendon manipulim dhe ‘tren bullgar’, duke kërkuar pavlefshmëri dhe përsëritje zgjedhjesh, ka kaluar në fazën përfundimtare të tij, në shkallën e tretë.
U vu re “rikthimi” në këtë fazë edhe i përfaqësuesit ligjor të PS, Eridjan Salianji, kurse përfaqësues i PD është Marash Logu. Por demokratëve nuk i del e ‘keqja’ me anëtarin e KAS, Ilir Rusmali, ish-ministër i PD-së në qeverinë “Berisha”.
Përfaqësuesi i PD, Marash Logu, ngriti në Kolegjin Zgjedhor edhe çështjen “Rusmali”:
“Prania e Rusmajlit në KAS cenoi parimin e paanshmërisë, ne kemi kërkuar përjashtimin e këtij anëtari, pasi për shkak të pozicionit që mban si këshilltar i presidentit, vendimet e mëparshme që ka marrë, apo fjalëve drejtuar përfaqësuesit të ankimuesve, mendojmë ishte në shkelje të paanshmërisë. Vetë ky anëtar ka shkruar vendimmarrjen për përjashtimin e tij. Ai as nuk duhet të ishte i pranishëm, as të merrte vendim, as të shkruante vendimin për kërkesën tonë për përjashtimin e tij”, tha Logu mes të tjerash në ankimimin e tij.
KQZ rrëzoi pretendimet e Logut dhe PD gjatë seancës, duke deklaruar se nuk sollën asnjë provë gjatë procesit për parregullsi dhe se denoncimet ishin bërë vetëm nëpërmjet rrjetit social FB. KQZ e pyeti PD-në nëse ishte ndaluar ndonjë person që të votonte, si dhe nëse kishin prova konkrete për parregullsi.
Gjithashtu Kolegji kërkoi disa shpjegime nga ankimuesit, sikurse edhe pretendimet për raportin e OSBE-ODIHR.
Logu pretendoi se DHL kishte shkelur kontratën me KQZ duke pajtuar nënkontraktor. Në lidhje me anëtarin e KAS, Rusmali, KQZ shpjegoi se ai nuk ka shkelur ligjin dhe as është në konflikt interesi. Në fund, rreth orës 13:30, Kolegji vendosi ta rrëzonte padinë e parë të PD-së.
Po sot në rend dite pas Lezhës pritet të shqyrtohen Gjirokastra në orën 12:00, Kukësi në orën 13:00 dhe Korça në orën 13:30.
Për të 4 qarqet në fjalë KAS certifikoi rezultatin e 11 majit të pandryshueshëm, ku në dy prej tyre fitoi PD-ja dhe në dy të tjerat PS-ja. Kolegji Zgjedhor i Gjykatës së Apelit Administrativ është shkalla e fundit që ‘vulos’ edhe certifikimin e rezultatit me formë të prerë.
Ditën e sotme (18 qershor), ka nisur edhe shqyrtimi i ankimimit të PD-ASHM për qarkun Lezhë, i pari në rend dite. Pas disa orësh seance dhe shqyrtimesh që kaloi me debate mes palëve, teksa u dëgjuan të gjitha pretendimet, Kolegji e rrëzoi kërkesën e demokratëve si të pa mbështetur në prova.
