Sytë e gjithë amerikanëve dhe qytetarëve në gjithë botën janë kthyer nga Nevada, shteti amerikan i cili ka “privilegjin” të nxjerrë fituesin e zgjedhjeve. Sipas rezultateve më të fundit të përditësuar nga mediat vendase, Joe Biden ka 264 vota elektorale (mandate) nga 270 që i duhen për të fituar, ndërsa republikani Donald Trump ka marrë deri tani 213 vota të tilla.
Vetëm Nevada ka 6 mandate apo vota elektorale, vota të cilat i japin Joe Biden automatikisht shumicën dhe e çojnë në nivelin e 270 votave elektorale që i duhen për t’u shpallur fitues i zgjedhjeve Presidenciale në SHBA.
Aktualisht numërimi i votave vazhdon në disa shtete, ndërsa diferenca në vota popullore mes dy liderëve është e madhe, afro 4 milionë, dhe në vota elektorale gjithashtu. Por në Nevada, pavarësisht se kryeson Biden, Trump është vetëm 8 mijë vota larg dhe janë pa u numëruar 25% të votave.
Zyrtarët zgjedhorë dje kanë thënë se rezultatet e ardhshme për Nevadan do të postohen të Enjten (sot) në 17:00 GMT (09:00 me kohën lokale në SHBA).
Sipas përditësimit të fundit të mediave amerikane (Ne i referohemi Fox News), demokrati Joe Biden kryeson deri në këto momente përballë Donald Trump, raporton newsbomb.al.
Joe Biden ka fituar 238 vota elektorale nga 270 që duhen për tu zgjedhur President, ndërsa Donald Trump ka 213 vota elektorale.
Mes dy kandidatëve ka një diferencë të ngushtë votash në total. Biden kryeson me 50.4% të votave në krahasim me 48% të votave të Donald Trump. E përkthyer në shifra, janë: 72,077,457 vota për Joe Biden dhe 68,601,159 për Donald Trump.
(Klikoni mbi foton më poshtë për ta zmadhuar)
Si funksionon sistemi i votave?
Zgjedhja e presidentit amerikan nuk varet nga numri i votave. Fituesi vendoset nga kollegji zgjedhor, një trupë prej 538 zgjedhësish të caktuar për këtë punë, ose delegatësh, që caktohen nga secili shtet dhe nga Uashington D.C. Që të fitojë një kandidat duhet të fitojë sa më shumë shtete për të siguruar shumicën e atyre që kanë zgjedhur shtetet për kolegjin zgjedhor, pra 270. Arritja e kësaj shifre është e vetmja gjë që ka rëndësi në zgjedhje
