Detaje të reja publikohen nga ngjarja tragjike që ndodhi mesditën e sotme në Peshkopi, ku djali 26-vjeçar vrau me automatik prindërit e tij.
Qemal Sela kishte qenë emigrant prej shumë vitesh në Angli ndërsa familja e tij kishte në pronësi një hotel në zonën e llixhave pranë Peshkopisë.
I riu ishte kthyer nga emigrimi mbrëmjen e djeshme në shtëpinë e tij ndërsa në momentin e vrasjes prindërit e tij kanë qenë në hotel.
Qemal Sela ka shkuar paraditen e sotme aty dhe rreth orës 12:00 pushuesit dëgjuan breshërinë e armës. Më pas ata panë 26-vjeçarin që doli me armë në dorë për t’u larguar, por është parë rastësisht nga një automjet i forcave policore.
Policët po shkonin për në poligonin e qitjes aty pranë kur kanë parë të riun me armë në dorë. Ata i kanë kërkuar që të ndalojë dhe i kanë marrë armën me të cilën kreu vrasjen, shkruan TCH.
Më pas kanë zbuluar se Qemal Sela ka vrarë në vend babanë e tij Flamur Selën,55 vjeç dhe nënën Zeqimete Sela, 50 vjeçe.
Deri tani dyshohet se shkaku i vrasjes kanë qenë mosmarrëveshjet që familja kishte mbi pronësinë e hotelit, i cili administrohen nga babai, por aty punonin motra dhe vëllai i autorit.
Detaji më tragjik vjen pikërisht nga motra, e cila ka qenë prezente dhe ka parë gjithë ngjarjen me sytë e saj. Ajo është dërguar në spital në gjendje shoku dhe është dëshmitarja kryesore e cila pritet të zbardhë më vonë ngjarjen.
Thuhet se i riu ka qenë i shtruar në një spital në Angli rreth tre muaj për probleme të shëndetit mendor.
