Ish-polici që vrau George Floyd, duke e mbytur me gjunjë në momentin e arrestimit u dënua me 22.5 vite burg.
Vendimi ndaj Derek Chauvin është dhënë nga gjykatësi Peter Cahilll në Minesota. Cahill tha se 22 vite burg ishin për krimin e kryer dhe gjashtë muajt e tjerë për mizorinë me të cilën u krye ky krim.
Para se të jepte vendimin, gjykatësi bëri një përshkrim të shkurtër arsyetues të vendimit të marrë.
Arsyetimi i plotë i vendimit është me 22 faqe. Kjo çështje, tha gjyqtari, është një analizë ligjore që nuk bazohet te emocionet, apo simpatia.
“Megjithatë, jam në dijeni të dhimbjes brenda dhe jashtë kësaj salle. Dhimbja është ndjerë në të gjithë vendin, por më së shumti ne duhet të mirëkuptojmë dhimbjen e familjes së Floyd”, deklaroi gjyqtari.
Prokurorët kërkuan 30 vite burg për Chauvin, autori i vrasjes së Floyd para kamerave amatore gjatë momentit të arrestimit. Sipas prokurorisë, ish-polici u njoftua disa herë se Floyd nuk po merrte dot frymë, por pavarësisht kësaj e mbajti gjurin me peshën e të gjithë trupit të tij në qafën e të ndjerit për rreth 9 minuta.
Vdekja e George Floyd u vra më 25 maj të 2020 dhe pasoi një valë të pazakontë protestash edhe të dhunshme në SHBA me sloganin “Black Lives Matter”. Këto protesta frymëzuan nisjen e një fushate globale kundër racizmit.
