Gjykata e Vlorës la dje në burg Kasëm Pirjasin dhe Hysnie Hoxhallarin, të akuzuar për vrasjen dhe më pas djegien më 21 janar të këtij viti të Selkie dhe Olsi Hoxhallarit, nënë e bir.
“E prekur” nga humbja e të shoqit dhe vjehrrës së saj, Hysnia në shenjë zie ishte e veshur e gjitha me të zeza, teksa doli para trupit gjykues. Ata u akuzuan për veprat penale “Bashkëpunim në vrasje” dhe “Moskallëzim krimi”. Pas ballafaqimit me provat e Prokurorisë, është dhënë edhe vendimi për arrest në burg, ndërkohë që më pas Gjykata ka shprehur dhe moskompetencë për çështjen, duke ia kaluar tashmë Krimeve të Rënda në Tiranë. Hysnie Hoxhallari dhe Kasëm Pirjasi janë sjellë të veçuar në Gjykatë, ndërsa seanca është zhvilluar e përbashkët.
Kunata ndjek seancën e 26-vjeçarit
Pavarësisht krimit të rëndë e tradhtisë, duket se bashkëshortja e Kasëm Pirjasit e ka falur atë. Ajo nuk ishte e pranishme dje në seancën gjyqësore, por është parë motra e saj, e cila ka ndjekur procesin në Gjykatë, si një shenjë kjo mbështetjeje për 26-vjeçarin.
Ndërkaq, në lidhje me fëmijën e mitur të Hoxhallarit, sipas avokatit të saj, mund të kërkohet kujdestaria e fëmijës nga familjarët e Hysnies. Por kjo, sipas tij, mbetet për t’u parë në vijim, edhe si do të shkojnë hetimet dhe çfarë dënimi do të marrë 32-vjeçarja.
“Jemi në hapat e para të gjykimit, por fëmija aktualisht është nën kujdesin e të afërmve”, u shpreh avokati. Mësohet se Kasëm Pirjasi rrezikon nga 20 vjet deri në burgim të përjetshëm.
Avokati: Kasëmi kërcënoi Hysnien
Ndonëse askush nuk u paraqit nga familjarët e Hysnie Hoxhallarit në seancën e djeshme, dikush prej tyre ishte kujdesur për t’i gjetur asaj një avokat.
Sokol Zotaj, mbrojtësi ligjor i 32- vjeçares u shpreh dje se Prokuroria nuk ka prova të mjaftueshme për implikimin e saj në vrasje.
“Gruaja ka qenë në banesën ngjitur, me atë ku ndodhi krimi, dhe menjëherë pasi ka kryer atë, Kasëmi ka shkuar dhe i ka thënë se e mbylli, pra, e përfundoi për shkak të xhelozisë se nuk mund ta takonte dot Hysnien për shkak se burri ishte kthyer nga Greqia. Nuk e kallëzoi krimin, sepse ajo pretendon se ndihej e kërcënuar, pasi Kasëmi i tha se nëse do të tregonte, do ta vriste atë dhe djalin. Por, dhe për shkak se jetojmë në Shqipëri dhe një lidhje jashtëmartesore paragjykohet nga opinioni publik. Sipas asaj që thuhet dhe dyshohet, është një lidhje disavjeçare, tre vjet mes tyre”, deklaroi avokati.
Sipas tij, ajo në Gjykatë i është përmbajtur asaj çka ka deklaruar në Polici.
