Del foto e viktimës, Naim Bajri, 68-vjeçari i cili u ekzekutua të premten e 3 qershorit në Shkodër.
Plumbat ndaj tij u shkrepën teksa ai ishte duke konsumuar kafen e mëngjesit në një lokal në vendin e quajtur “Merkata e Rusit” në lagjen “Partizani” në Shkodër.
Kanë qenë 2 persona me maska që kanë qëlluar me të paktën 10 plumba nga një automjet në lëvizje në drejtim të Bajrit, tregtar peshku, duke e lënë atë të vdekur.
Plumbat kanë kapur edhe Astrit Zenelin, punonjës në biznesin e Bajrit, i cili ishte duke pirë kafe me viktimën. Ai është dërguar në spitalin rajonal të Shkodrës ku aktualisht ndodhet jashtë rrezikut për jetën.
Pak minuta pas ngjarjes, policia ka gjetur një automjet të djegur në lagjen “Guerile” në Shkodër, i cili dyshohet se u përket autorëve.
Policia e Shkodrës dhe FNSH kanë ngritur disa pika kontrolli në hyrjet dhe daljet e qytetit ndërkohë që drejt kryeqendrës së veriut janë nisur edhe grupet e RENEA-s nga Tirana.
Naim Bajri është babai i Indrit Bajrit i ekzekutuar me snajper më shum se 20 vite më parë, në tetor të vitit 2001 në Shkodër.