Interes për ngjarjen ka edhe dëshmia e njërit prej të arrestuarve, që quhet Geldo Hoti.
Ky i fundit ka qenë në lokal në momentin që ka ndodhur përplasja dhe ka rrëfyer për Prokurorinë dinamikën e ngjarjes. Hoti u arrestua teksa përpiqej të kalonte kufirin për në Greqi. Kështu, sipas dosjes hetimore, ai ditën e ngjarjes, rreth orës 14:00 ka shkuar te lokal “Monopol” ku është takuar me pronarin Redi Popesku.
Pak më vonë, në lokal ka ardhur edhe Ervin Mata, Joli (Mevjol Bilo), që është miku i Ervinit dhe së bashku kanë shkuar te një lokal që quhet “Zihniu”, pranë “Karlsbergut”.
Duke drekuar, në lokal ka shkuar një person që i thërrisnin Tani dhe me mbiemër Allushi, i cili shoqërohej me një person tjetër rreth 170 cm i gjatë, i shëndoshë, me flokë të shkurtra, rreth 40 vjeç dhe këta persona janë ulur me ta në tavolinë.
Rreth orës 18:00 janë çuar nga lokali dhe kanë shkuar përsëri te lokal “Monopol”, ku janë ulur përsëri të gjithë bashkë. Rreth 1 orë më pas, Ervini ka dalë jashtë lokalit ku është takuar me shtetasen Elvana Gjata, e cila sipas tij është e fejuara e Ervinit dhe kur është kthyer brenda, u ka thënë se dikush i kishte ngacmuar të fejuarën dhe ky person do të vinte në lokal për t’u sqaruar.
Atij nuk i kujtohet orari i saktë, por fillimisht në lokal kanë hyrë 3 persona dhe Ervini sapo ka parë këta persona është ngritur nga tavolina dhe i ka takuar te banaku. Rreth 1-2 minuta më pas, në lokal kanë hyrë 2 persona të tjerë, njëri nga personat e sapofutur ka nxjerrë nga brezi një armë pistoletë dhe na është drejtuar te tavolina ku ishim ulur me fjalët: “…mos të lëvizi njeri se do t’ju q**** r***!”.
Në këtë moment deklaruesi është ngritur nga karrigia për të ikur, por personi që mbante armën në dorë i është drejtuar me fjalët “Mos lëviz”. Në këtë moment, njëri nga të pestë personat që janë futur në lokal ka thënë: “Çfarë problemi ke që shikon?”.
Hoti ka thënë në Prokurori se nuk është i sigurt se këto fjalë kanë qenë në drejtim të Ervin Matës apo personave që ishin të ulur në tavolinë me të. Personi, i cili mbante armën në dorë, është afruar te tavolina dhe pasi e ka kapur nga qafa Jolin, është konfrontuar fizikisht me të dhe deklaruesi është shtrirë barkas poshtë tavolinës dhe aty ka dëgjuar disa krisma arme dhe pas përfundimit të krismave ai ka dalë nga lokali dhe është larguar i vetëm në drejtim të automjetit të tij që e kishte parkuar përballë shkollës “Petro Nini Luarasi”.
Ai, shtetasin Ervin Mata e njeh në marrëdhënie pune, e ka takuar gjithsej rreth 3-4 herë dhe është njohur me të rreth 3-4 muaj më parë. Në lidhje me pozicionet që kanë pasur personat në tavolinë me të, ai shpjegon se vet ka qenë i ulur te këndi afër dritares, duke filluar nga pozicioni i tij në sens kundraorar nga e djathta ka qenë Ervin Mata, Tan Allushi dhe përballë me Ervinin ka qenë i ulur personi me emrin Joli.
