Gjykata e Tiranës vendosi sot të pranojë kërkesën e Izet Haxhisë për të rihapur atë që është cilësuar si “Dosja e Shekullit”, dosja e çështjes “Hajdari”.
Izet Haxhia është dënuar me 25 vite burg i akuzuar për vrasjen e Azem Hajdarit.
Në përfundim të seancës, avokati mbrojtës i Izet Haxhisë ka thënë se ditë të mira po vijnë për drejtësinë, duke shtuar se Haxhia është gjykuar në mungesë me një dosje që është skandaloze.
Ai shtoi:
Para se t’ju përgjigjem pyetjes, me këtë vendim që mori gjykata e shkallës së parë Tiranë, është një ditë shumë e mirë për shqiptarët. Përsa i përket aspektit procedurial, do procedojmë më tej me ankimimin. Do provojmë se s’na takon dënimi 25 vjet por pafajësia.
Ka prova Izet Haxhia që është i pafajshëm. Do sqarojmë pozicionet tona. Dosja, politike e qepur keq. Duam të gjykohemi e të rigjykohemi. Dosja është skandaloze. Vetëm dje kemi patur mundësinë ta prekim fizikisht dosjen prej 700 e ca faqeve. Janë mbi 21 politikanë me në krye të parin e vendin, që janë thirrur për dëshmitarë e s’kanë begenisur.
Kanë patur të gjithë një seli. Sot është ora që drejtësinë ta përfillin të gjithë. Do vijnë të gjithë politikanët. Nëse dje ishin të zënë me punë le t’a bëjnë nesër. Janë dhënë 1 milionë euro për të vrarë Izet Haxhinë. Shkaku madhor ka qenë rreziku për jetën, rrezik permanent për Izet Haxhinë. Më në fund do ketë drejtësi, pa le të përmbyset bota. Kam shumë besim tek drejtësia.
