Horgito Peqini, autori i vrasjes së Madrit Ulqinakut në Elbasan disa ditë më parë, u la në masën arrest me burg këtë të enjte.
Panorama.al mëson se përmes avokatit të tij, Peqini ka pranuar autorësinë e krimit, teksa ka kërkuar që të lirohen dy miqtë e tij, Klaudjan Sallufi dhe Ejden Dino.
Pavarësisht se më herët policia ka raportuar se Horgito Peqini është 18 vjeç, gjatë seancës gjyqtarja Pajtime Fetahu thotë se ai është i datëlindjes 5 tetor 2004, pra është 17 vjeç. Fakti që është i mitur, mund të ndikojë në zbutjen e dënimit.
SI NDODHI NGJARJA, DËSHMIA E NJË PREJ TË ARRESTUARVE
Madrit Ulqinaku u vra mbrëmjen e 17 gushtit në Elbasan pas një konflikti të çastit me 3 të rinjtë, Ejden Dinon, Horgito Peqinin dhe Klaudjan Sallufin.
Sipas dëshmisë së dhënë nga Ejden Dino, të rinjtë kanë konsumuar kokainë atë mbrëmje dhe kanë lëvizur të droguar në rrugë. 18-vjeçari dëshmoi në gjykatë se ai kishte një thikë me vete, ndërsa Horgito Peqini një pistoletë.
Ata të tre janë përballur në rrugë me Madrit Ulqinakun, ku fillimisht konflikti nisi “çfarë ke që sheh, pse më bëre pis”. Kjo ka ashpërsuar konfliktin, ku më pas Horgito Peqini nxorri pistoletën dhe qëlloi nga pas 33-vjeçarin Madrid Ulqinakun, duke e lënë të vdekur në vend.
Ejden Dino ishte i pari që u arrestua nga policia një ditë pas ngjarjes ku pas kontrollit, iu gjet një thikë me vete. Ndërsa Horgito Peqini dhe Klaudjan Sallufi u prangosën disa ditë më vonë.
